Аьскер яс йигитти коркынышсызлыкка, эркликке эм Аталыгын коршалавга уьйрететаган мектеб болады. Эрклик мектебин оьткенлер, онда беркип катканлар, сый — оьрмет акында шынтылайын билгенлер Элин коршалап боларлар. Уьйкен несил ясларга дайым коьрим болып келеди. Боьтен де Эли уьшин тийисли кепте аьскерде аьрекет эткенлер. Сога коьре ясларга ясуьйкенлердинъ берген маслагатлары эм насихатлары бек керекли эм пайдалы. Терекли-Мектеб авылынынъ яшавшысы, оьз заманында тийисли кепте Эл алдында эр борышын толтырган Солтан Валиев аьскерге шакырылган яс йигитлерге намыслы кепте эр борышын толтырмага шакырув этеди.
– Аьр бир аьдемге Эли алдында эр борышын толтырмага – Россия Аьскерининъ сырасында аьрекетлемеге заман келеди. Бу куьнлерде, Украинады денацификация эм демилитаризация этуьв бойынша спецоперациясы оьтип турган заманда, Россия Савытлы куьшлер сырасында аьрекетлев эки кайта сыйлы.
Россия Президенти Владимир Владимирович Путиннинъ Указы бойынша аьскерде аьрекетлеген яслар спецоперация юретаган ерге йиберилмееклер. Соьйтип, бас коьтерип турган нацистлер мен куьреске аьскершилик сулыбы болган аьдемлер йол аладылар. Россия Савытлы куьшлер сырасын толтырып, сыйы ман, таза намыс пан, эркли кепте аьскерде куллык этуьвдинъ кыйынлыкларыннан оьтинъиз.
Энъ де маьнелиси Элимиз – Россияды суьйинъиз, оны коршаланъыз эм оьз Эли алдында эр борышты толтырдык деген сезим мен ата-ананъызга, кардаш-ювыкларынъызга, досларынъызга, суьйдимли кызынъызга кайтынъыз», – деди Солтан Валиев.
Н.Кожаева.
Суьвретте: Солтан Валиев.