Ногай район орталыгында, коьптеги аьдетке коьре, Енъуьв байрамы ногай халкынынъ Баьтирлер аллеясында эстеликлерге, «Данък» орденининъ толы иеси Алимхан Асанов атындагы орамдагы эстеликли белгиге шешекейлер байламларын салувдан басланды.

Сонъ яшавшылар эм район орталыгынынъ орта мектеблер окувшылар колоннасы яркын байраклар, шарлар эм шешекейлер мен, савлай халктынъ суьйикли йырлары ман Уллы Аталык согысы йылларында ян берген ердеслеримиздинъ сыйына Ф.Капельгородский атындагы парктагы Мемориалга карап йолландылар.
Мунда совет халкынынъ немец-фашист Германиясын енъгенли 77 йыл толганына багысланып, район яшавшылар митинги озгарылды. Оны ашты эм юритти ДР-нынъ ат казанган маданият куллыкшысы Сабират Абубекерова.
Аьдеттегидей, бас деп район яшавшыларын Енъуьв байрамы ман Ногай район аькимбасынынъ ис борышларын толтырувшы Хамидулла Саитов кутлады.
– 9-ншы Май – баьримиз уьшин айырым байрам куьни. Бу куьн биз халкымыздынъ куьш-куватлыгын эм уллылыгын ярык сеземиз. Тек бир Ногай район ериннен 2500 аьдем фронтка кеткен, олардынъ 1900 аьдеми урыслар оьткен ерлерден кайтпаган. Аьр аьелде яс несилге коьрим болатаган оьз баьтири бар. Бизим ердеслер, атларын Аталыгымыздынъ тарихине язып киргизип, йигерлигин эм йигитлигин коьрсеткенлер. Оькинишке, буьгуьн олар согыс ветеранлары арасында йок, ама бизим юреклерде эм эсимизде – дайымга, – деп белгиледи Хамидулла Саитов.
Ногай районынынъ Савытлы куьшлер эм ыхтыяр саклав органлар советининъ председатели Акманбет Сангишиев Уллы Енъуьвге район кы- йыншыларынынъ эткен косымы акында доклад пан шыгып соьйледи. КПРФ Дагестан РК, КПРФ Ногай РК, ДР Халк Йыйынында КПРФ фракциясы атыннан ДР Халк Йыйынынынъ депутаты Мурзадин Авезов район яшавшыларын кутлады. Оьз соьзинде ол 1945-нши йылда совет халкы ман нацизмге дурыс эм каты айыплав шыгарганын белгиледи. «Дуныя Хатынь, Волынь, Саласпилс ерлерде болган затлар дайымга озган заманга кеткенине сенген эди, ама, аьли коьрингенлей, фашизм буьгуьн де бизим берклигимизди тагы да сынайды – деп соьзин бардырды ол. Ама аьли де бизим еримизди бандеровщинадан эм нацизмнен коршалавга бизим янъы йигитлеримиз – Уллы Аталык согысынынъ аьскершилерининъ увыллары, уныклары эм немерелери турдылар. Бизим ата-бабаларымыздынъ маслагатларына алал болып, биз халкымыздынъ негизинде – совет халкынынъ ян куьшин саклав уьшин колларымыздан келгенин этпеге борышлымыз: тагы да Уллы Енъуьвдинъ Кызыл Байрагы – халкымыздынъ баьтирлик эм данъклык белгиси оьктемли яйнап турсын», – деп белгиледи М.Авезов.
Кутлав соьзлери мен, тынышлыкты эм тоьбеде ярык коьк сакланганын йорав ман 03007 номерли ерли аьскершилик боьлигининъ командири Магомед Гаджимагомедов, ДР-нынъ ат казанган яслар насихатшысы Зубаир Аджибаев, Ногай районынынъ Депутатлар Йыйынынынъ председатели Джамалутдин Эсиргепов, согыс катнасувшысы Казгерей Аракчиевтинъ немереси Алишер Юмартов шыгып соьйледилер.
Сонъ «Без срока давности» Савлайроссиялык конкурсынынъ регионаллык эм муниципаллык кезегининъ енъуьвшилерин Ногай район аькимбасынынъ ис борышларын толтырувшы Хамидулла Саитов эм район билимлендируьв боьлигининъ етекшиси Алтын Агаспарова кутладылар.
Район орталыгынынъ ис коллективлер ваькиллери эм яшавшылары согыс йылларында Эли уьшин янларын курман эткен ердеслер сыйына салынган эстеликке шешекей байламларын салдылар. Митинг катнасувшылары согыс йылларында урыслар майданларыннан кайтпаган, солай ок, давдан кайтып, оьз коллары ман бузылган халк хозяйствосын кайтадан тургызганлар эм буьгуьнде арамыздан тайганлар эстелигине бир такыйка уьндемей турдылар.
Коьпйыллык аьдеттегидей, ерли гарнизоннынъ аьскершилери уьш кере савыт-садактан аттылар.
Митингтен сонъ, яй кинотеатрынынъ фасад еринде «Песни тоже воевали!» деп аталып, театрлык коьрсетуьв оьтти.
Бу куьн, савлай район яшавшылары «Бессмертный полк» акциясында катнасты. Эслилер, яслар эм балалар колларында бизим баьримиз уьшин аявлы болган оьз ювыклары – Уллы Аталык согыс ветеранларынынъ суьвретлери мен бара эдилер.
Кеште «Халк яратувшылыгынынъ орталыгы» МКУ фасадында саният усталарынынъ катнасувы ман байрам концерти бардырыла берди. Сонъ салют-фейерверк оьтти. Байрам куьни согыс темага фильм коьрсетуьв мен тамамланды.
М.Юнусов.