Янъыларда Халк яратувшылык эм маданият оьрленуьвининъ орталыгында «Ыхтыяр бузувлардынъ алдын шалувында аьелдинъ эм аьел тербиялавынынъ орыны» деген темага багысланып, ортак мектеб ата-аналар йыйыны уйгынланып оьтти. Оны Терекли-Мектебтинъ Кадрия атындагы орта мектебининъ администрациясы уйгынлап озгарды. Шара Россия Федерациясынынъ гимны ман ашылды. Йыйында оьз докладлары ман Кадрия атындагы мектебининъ етекшиси Альфия Акимова, Ногай район прокурорынынъ коьмекшиси Сталинбек Абдуллаев, «Единая Россия» партиясынынъ район боьлигининъ секретари Амирхан Межитов, Ногай районы бойынша Россия МВД-сынынъ ПДН эм ОУУП боьлигининъ тамада инспекторы Кайтархан Акмурзаева, «Шоьл тавысы» республикалык газетасынынъ бас редакторы Эльмира Кожаева, Кадрия атындагы мектебининъ савлай мектеб бойынша Ата-аналар комитетининъ председатели Сабират Саитова, тарих эм обществознание дерисиннен окытувшысы Фатира Магомедова шыгып соьйледилер.
– Кадрия атындагы мектеби 1914-нши йылда негизленген. Буьгуьнлерде онда 495 окувшылары билим аладылар, мектебте 65 аьдем аьрекет этеди, сонынъ ишинде 52 окытувшылар боладылар. Аьлиги замангы мектебти туьзуьв йолында биз заман ман сыналган куьн сайын янъыдан-янъы кыйынлыклар ман да расамыз. Ама биз янъы ойымыз бан – онъайлы мектебин туьзуьвде оьзимиздинъ ымтылысымызда бир де токтамаякпыз. Сыйлы ата-аналар, мектебимизди келеекте де бирге оьрлендирмеге бизим куьшимиз етеегине, бу йылды да исимиздинъ баьри якларын да ийги коьрсетимлер мен озгармага болаягына бек сенемен. Сизге яратувшылык эм кеспилик уьстинликлерин, ойлаган мыратларынъыз яшавга айланганын йорайман, – деди оьз соьйлевинде мектеб етекшиси Альфия Акимова.
Йыйында уьйкен эс патриотлык тербиялавына да каратылды. Согыс спецоперациясында ортакшылык эткен йигитлеримизге де айырым эс берилди, олардынъ акында коьп йылы соьзлер айтылды. Айтпага, аьлиги заманда россия аьскерлери юритип турган согыс спецоперациясында Кадрия атындагы мектебининъ выпускниклери эм олардынъ ата-аналары да ортакшылык этип келедилер. Элин коршалавга йолланган Келдали Кокшеевтинъ анасына савга тапшырылув шагында Кайтархан, Кадрия атындагы мектебининъ выпускниги болган увылына эм оьзине каратылган уьйкен эс уьшин мектеб етекшиси Альфия Акимовага коьнъил сезими мен уьйкен разылыгын билдирди.
Ногай районынынъ прокурорынынъ коьмекшиси Сталинбек Абдуллаев те оьз докладында ясы етпегенлердинъ кыянатлык этуьвининъ эм ыхтыяр бузылувларынынъ алдын шалувы бойынша темасын ашыклап коьрсетти.
– Оьспирдинъ не зат коьргени, не зат оны кыйнаганы, аьжейипке калдырганы, каьр шеккени, бир зат пан языксынувы, суьюви эм ашувланувы онынъ ата-анасы ман байланыслы. Балалар ман эдап-ыхтыяр темасына багысланган китаплер, макалалар, телеберуьвлер уьстинде кенъескенде, ата- аналарга оьз аьвлетлеринде борыш эм яваплык деген сезимлерин кеплендирмеге тийисли, – дейди Сталинбек Абдуллаев.
Кайтархан Акмурзаева оьз соьзинде ата-аналар аьвлетлери артыннан карамага керегин, солай болып, коьликке оларды айдамага олтыртпага ярамайтаганын айтты. Тагы да Интернет тармагында саьбийдинъ не зат пан кызыксынатаганына эс бермеге керегин белгиледи.
Шарада Кадрия атындагы мектебининъ билимлендируьв – танув исининъ туьзилуьвине де салдарлы ярдамын этип келген ата- аналарды да белгиледилер.
Йыйын Россия Президенти В.Путиннинъ Россияга ДНР, ЛНР, Запорож эм Херсон областьлери косылув шагындагы видео-шакырувы ман тамамланды. Сол шакырувды йыйылганлар узак карс кагувлары ман хош коьрип алдылар.
Соьйтип, Кадрия атындагы мектеби озгарган йыйын пайдалы эм кызыклы кепте оьтти.
Г.Нурдинова.
Суьвретлерде: А.Акимова; йыйын аьсеринде.
