Янъыларда ногай тилинде «Табиат дуныясы» деген кызыклы китап дуныя ярыгын коьрди. Онынъ туьзуьвшиси Россия Язувшылар союзынынъ агзасы, шаир Асан Найманов болады. Бу шыгарма калай кишкей балалар эм мектеб окувшылары уьшин болса, солай ок ясуьйкенлерге де пайдалы болаяк деп, билемиз. Ол балалар бавлардынъ тербиялавшыларына, ортак билимлендируьв мектеблердинъ окытувшыларына, ата-аналарга балаларды ногай тилине уьйретпеге, олардынъ тил байлыкларын оьстирмеге ярдам этеек. Китаптинъ ишинде айванлардынъ, куслардынъ, балыклардынъ, тереклердинъ, оьсимликлердинъ, шешекейлердинъ атлары, олар акында коьплеген кызыклы билдируьвлер бар. Сондай болып, ол туьрли туьсли суьвретлер мен де келбакланган. Айтып озбага тийисли, китаптинъ туьзуьвшиси онынъ ишине кирген билдируьвлерди «Ногайша-орысша соьзликтен», «Маьметекей» адабиат-суьвретлев журналыннан, «Ногай давысы» газетасынынъ бетлериннен алган. Китап «Суьт ишетаган айванлар», «Ерде йылысып юретаган айванлар», «Куслар», «Балыклар», «Тереклер», «Оьсимликлер», «Шешекейлер» «Соьзлик» деген боьликлерден туьзилген. Китаптинъ туьзуьвшиси «Табиат дуныясын» шыгармага ярдамларын эткен аьдемлерге: Б.Матакаевке, Р.Катагановка, А.Кангли- евке, Э.Шешеновка, Ф.Кой- любаевке, Ф.Абдулмежи- товага, Н.Аюповка, С.Ка- заковка, И. Кумуковка, Эльмира эм Ильяна Канглиеваларга, А.Битлевке, А.Аджиманбетовка, А.Бу- латуковка, И.Джазовага, П.Керимовка, З.Шерпеев- ке, Н.Даутовка, А.Найма- новка, А.Борановка, А.Ко- шеровка, Ш.Айтугановка, Р.Мустафаевке, Р.Нурлиев- ке, М.Кадракаевке эм Дагестан Республикасынынъ Ногай районына муьсиревин билдиреди. Китаптинъ тиражы – 300 экземпляр. Биз китаптинъ туьзуьвшиси, калемдасымыз Асан Наймановты шыгармадынъ ярык коьруьви мен кутлаймыз, алдыда янъы коьп яратувшылык табынышларды сагынамыз.
М.Алимова.