Бизим республикамыз бойынша, савлай Россия Федерациясынынъ регионларындагындай болып, коронавируслы мараздынъ яйылувы куьшленген деп айтпага боламыз.

Бу куьнлердеги аьллерди алып карасак, бу мараз бан зарарланганлардынъ санын эситкенде коркыныш тувады. Медицина куллыкшыларынынъ билдируьвлерине, анълатувларына коьре, вирус бир кебинде турмайды, куьннен-куьнге оьрленип, янъы кеплери де шыгады. Янъы кеп болганлай, мараз да туьрли болады. Сан яктан алып караганда, сутка ишинде доьрт юзге ювык аьдем мараз бан зарарланганы аянланады. Алдын коронавируслы маразы ман тек уьйкен аьдемлер авырыйтаган болган болса, бу куьнлерде сол зарарлы мараз бан эм баска кеплери мен балалар да зарарланадылар. Оьткен юмадынъ ишинде респуб- лика бойынша коронавируслы маразына карсы оперативли штабынынъ йыйынында регион етекшиси Сергей Меликов коронавируслы маразын барын яде йогын тергейтаган тестлерди озгарувды куьшейтпеге керек деп айтып кеткен. Сол тергевлер бойынша авырувлылар бары аянланады, араларында балалар да зарарланганы коьринеди. Сол ок йыйында, регион етекшиси керек болса, мектеблерде окувды дистанционлы кепке де шыгармага болатаганын (эгер, балалар араларында авырыганлар коьп болса) билдирген.
Аьли уьшин республикамыз бойынша окувдынъ дистанционлы кебине шыккан айырым мектеблер де бар. Ногай районымыз бойынша эки мектебтинъ Орта-Тоьбе авыл эм А-Х.Джанибеков атындагы мектеблердинъ айырым класслары. Айтпага, Орта-Тоьбе авыл орта мектебининъ 8-10 классларынынъ окувшылары, А-Х.Джанибеков атындагы мектебиннен 8«в» эм 6«б» класс окувшылары уьйлеринде олтырып, эки юма узагында окувын бардырадылар. Солай ок, Нариман авылынынъ «Шолпан» балалар бавынынъ да бир куьби эки юмага тыншаювга кеткенлер.
Аьллер бу куьнлерде енъиллерден тувыл. Медицина куллыкшыларынынъ анълатувларына коьре, коронавируслы маразынынъ туьрли кеплери авыр тувыл, ама бек тез эм коьп аьдемге бирден югады. Сонынъ уьшин саклык эм санитарлык йорыкларды тутайык.
Г.Сагиндикова.