Уьстимиздеги йыл ишинде Кизляр районынынъ еринде «Формирование комфортной городской среды» деген республика бойынша проекти яшавга шыгарылды. Кизляр районында республика властьлерининъ демевлиги бойынша бу йылдынъ тамбыз, шилле айларынынъ ишинде балалар уьшин доьрт ойын майданлары кулланувга берилдилер.

Бесинши майданы сары тамбыз айынынъ 13-нши куьнинде Вперед авылында шатлыклы аьлде ашылды. Байрамга авыл яшавшылары, Кизляр районынынъ аькимбасы Аким Микиров, Вперед деген авыл администрациясынынъ аькимбасы Ибрагим Шахрурамазанов ортакшылык эттилер, кызыл лентады кесип, суьйинишли оьзгерис пен авыл яшавшыларын кутладылар. Кизляр районынынъ аькимбасы Аким Микиров муниципалитет ойын майданын ярастырувда ортакшылык эткенлерге уьйкен разылыгын билдирди. Баска болып «Формирование комфортной городской среды» деген республика бойынша проекти авыл ерлерине оьрленмеге бек ярдамласатаганын да белгиледи. Микировтынъ белгилеви мен, алдын бос турган ер бек ярасык эм онъайлы болды, ол республика бойынша Правительствомыздынъ, авылдынъ, район администрациясынынъ, подрядлык организацияларынынъ эм авыл яшавшыларынынъ биргелес исининъ тамамы болады. Сол майдан тек ерли балалар уьшин тувыл, ол тетейлеринде, атайларында конакта тыншаювда болган саьбийлер уьшин де шынты савга болды.
Солай болып авыл аькимбасы Ибрагим Шахрурамазанов балалар уьшин майданынынъ курылысында кол ярдамын этип келген авыл яшавшыларын атлары ман белгиледи