Мектебте ийги окыган балалар йогары билим ошакларда окыганда да оьзлерин ийги этип коьрсетедилер. Олар туьрли шараларда катнасып, оьз оьнерлерин коьрсетип, уьстинликлерге етиседилер.

Мавлимберди Кишинеевти баьримиз де талаплы йырлавшы деп билемиз. Кишинеевлердинъ аьелинде яратувшылык яс несилге коьшкен деп суьйиниш пен айтамыз. Сабина бала заманнан алып йырлайды, яттан ятлав окув конкурсларда катнасып, мектебте окыйтаган заманларда да биринши орынларды алган. Буьгуьнлерде ол – Ставрополь патшалык педагогикалык институтынынъ Ессентуки каласындагы филиалынынъ студенткасы, Сабина мектебке дейим балаларды тербиялав факультетининъ биринши курсында окыйды.
Аьлиги заманда окытувшы, тербиялавшы кесписин сийрек сайлайдылар, сога коьре Сабинадынъ кайдай сыйлы эм абырайлы кеспиди сайлаганына баьримиз де суьйинемиз.
Янъыларда институтта «Аталык не заттан басланады» деп аталып, яттан ятлав окув конкурсы оьтти. Сабина Кишинеева Ногай шоьлининъ белгили шаир кызы Кадрия Темирбулатовадынъ «Ногайым» деген ятлавын окып, биринши орынга тийисли болды (етекшиси Любовь Петровна Борисова). Кызды тоьрешилер мактадылар, ол бай тарихли ногай халкынынъ тилинде кайдай ярасык этип ятлавды окыды.
Йогары билимлендируьв ошагында окып баслаганнан алып, бу енъуьв Сабинадынъ биринши уьстинлиги. Мен ак юректен талаплы кызымызга аьли де коьп бийикликлер, окувында тек йогары белгилер йорайман.
Г.Бекмуратова.
Суьвретте: С.Кишинеева.