Кыстынъ аязлы куьнлеринде де, яздынъ шыркыраган шагында да Майра Кунтувган кызы Абдулжалиева (суьвретте) оьзининъ ис борышларын намыслы толтырып келеди. Терекли-Мектеб авылында оны танымайтаган аьдем саны да бек аз болса ярайды. Ол не шаклы орамларды кезгени, не шаклы шакырымларды оьткени тек оьзине белгили.

Биринши кере Майра-абамыз почта боьлигине 20 ясындагы кыз болып, 1976-ншы йылда ислемеге келген эди.

– Мени куллыкка Шора Ажибаев алган эди, баслапкы эки йыл мен телеграфта куллык эттим, авыл яшавшыларына келген телеграммаларды еткеретаган эдим, оннан сонъ почтальон куллыгы шыкты, мине соннан бери баска ис орынга коьшпей, ис аьрекетимди бардыраман, – дейди оьз куллыгына уьйкен суьйимин билдирип, Майра Абдулжалиева.
Оьзек те, заманлар туьрленип барадылар, алдынгы заманларда Майра-абай Аьскер сырасына увылларын йиберген аналарга хатлар аькетип суьйиндирип турган болса, аьли баспа изданиелерин эм туьрли уведомлениелерин еткереди.

Буьгуьнлерде Майра Абдулжалиева почта боьлигининъ 1-нши класслы почтальоны деген аттынъ иеси, байланыс устасы деген коькирек белгисин де алган. Сол белгиди ога Россия Байланыс министри оьзи тапшырган эди, оьзи ис ветераны да болады.

Янъыларда баьримизге де белгили болганлай, Ногай районымыз туьзилгенли 90 йыл толды, соны ман байланыслы болып, Майра-абамызга коьпйыллык етимисли иси уьшин, «Ногайский район» МР аькимбасы М.Аджеков атыннан Сый грамота ман савгаланды.