Россия Президенти Владимир Владимирович Путин РФ Федераллык Йыйынына каратылган Язбасында, 2021-нши йылдынъ коькек айында Оькимет алдына, регионлар басшылары ман биргелесте, аьдемлер яшайтаган ерлердинъ догазификация планын туьзбеге борыш салды.
– Авыллардынъ эм калалардынъ онъайлыгы, турак-уьй курылыстынъ оьсуьви – регионлардынъ оьрленуьвининъ маьнели барыслары. Бу ерде элимиздинъ яшавшыларынынъ куьндегилик каьр шегуьвлери акында мутпага ярамас. Аьлиги заманда коьплеген аьеллер газ тармаклары оьткерилген ерлерде яшайдылар, ама уьйлерине «коьгилдим отты» еткерип болмайдылар. Мине уьйдинъ яныннан труба оьтеди, тек газ уьйшиликте йок. Бу ерде мен «Единая Россия» партиядынъ ойын коьтергишлеймен – газопроводтан алып оьз уьйине дейим еткеруьв уьшин авыл эм кала яшавшылары кисесиннен акша тоьлемеге керек тувыл, – деп айтты Россия Президенти.
Догазификация – яшавшыларга керекли эм заманындагы салдарлы ярдам. Бар сондай аьеллер, оьз участокларына газды еткермеге карыжлар таппайдылар. Догазификация программасына кируьв уьшин керекли документлер туьзетпеге тийисли. Энъ де бириншилей, уьй регистрацияланган болмага керек. Элимиздинъ басшысы сондай борыш салады, сол толтырылса, инсанлар оьз уьйлеринде газ бан пайдаланмага боладылар.
Догазификация иси Дагестан Республикасы бойынша да юритилип туры. Йылдынъ басында регион басшысы Сергей Меликов кызыксынатаган структураларга исти белсенлетпеге талаплавлар эткен. Онынь айтувы ман, 2022-нши йыл бу соравларды шешуьвде маьнели болаяк. Дагестан Республикасынынъ Аькимбасы муниципалитетлердинъ аькимбасларынынъ алдына да борышлар салды.
– Мен биз быйыл савлай Дагестанды газифицировать этермиз яде энергетикалык комплексин кайтадан курармыз деп айтпайман, ама буьгуьнлерде биз бу сорав бойынша исти белсен юритпеге керекпиз. Муниципалитетлердинъ аьрекетинде бар себеплерди тайдырмай, биз Россия Президенти мен алдымызга салынган борышларын толтырып болмаймыз, – деп катырып айтты Сергей Меликов.
Аьлиги заманда аьр бир дагестаншы оьз участогынынъ япсарына дейим газды тегин аькелмеге болады, тек тийисли амалларды алмага керекли.
Г.Бекмуратова,
РФ Журналистлер союзынынъ агзасы.
