Ногай районы бойынша Россия МВД-сынынъ ГИБДД боьлигининъ йол-патруль службасынынъ инспекторы Арсланбек Махмуд увылы Акмурзаев оьзине тапшырылган ис орынында таза намысы ман куллыгын юритеди. Онынъ яваплылыгы акында ис йолдаслары да айтадылар.
Мен газета куллыкшысы болып, календарь бойынша белгиленетаган кеспи байрамларга уьйкен маьне берип карайман эм сол куьнге рас барып, сол белгиленеек ис орынларда аьрекет бардыратаган ийги куллыкшыларды да сорайман, оьзек те, сол да белгиленеек байрам иелерининъ етекшилериннен разылык алмай этилинмейди, ама халктынъ ойы да, белгилеви де маьнесиз тувыл. Ис аьрекетин ийги юритетаган аьдемлер де белгисиз болып калмайдылар, халк пан ислейтаганлар боьтен де тез коьринеди. Биревлер акында ийги данък шыгады, айлак та аьдемшилиги йок аьдемлер акында питне соьзлер де юредилер.
ГИБДД куьни келеятырганга коьре, мен сол тармакта ислейтаган аьруьв танысым ман маслагатласаман, ол мага бир ойланмай яс куллыкшы Арсланбек Акмурзаев акында язбага боласынъ деп айтты. Оьзек те, мен кимнинъ акында язбага боламан деген соравды Ногай РОВД пресс-службасынынъ куллыкшысына да бердим эм ол да мен язбага ниетленген аьдемди айтты. Энди мен таза намыс пан ис йолдаслары эм халк ишинде абырайы артып баратаган яс куллыкшы акында язаман.
Арсланбек Махмуд увылы Акмурзаев ГИБДД боьлигининъ инспекторы болып 2017-нши йылдан алып ис аьрекетин бардырады. Оьзининъ хабарлавына коьре, Арсланбек бу куллыкка анъсыздан келген аьдем тувыл, ол кишкейлей бу тармакта ислейтаган акасы Расиль Эсманбет увылы Акмурзаев коьрим болган экен.
Арсланбек оьзи айлак куьшли автокоьликлерди суьетаганын да ясырмай айтады. Ол коьптен коьликлер мен аьвлигип, ясайтаган болган. Оьзининъ айтувына коьре, ол айлак яслай автокоьлик айдап баслаган.
Буьгуьнги ис аьрекети Арсланбекке бек ярайды. Ол йолдагы автокоьлик юрисин тергейди эм сол белгиленген йорыкларды бузганларды аянлайды.
Бу йылгы кеспи байрамын Арсланбек Махмуд увылы Акмурзаев ис орынында йолыгады. Сол куьнди ийгилик пен йолыгып, алдыда тек ийги куллыкшы деген аты айтылып турганды йораймыз.
Г.Курганова.
Суьвретте: Арсланбек Акмурзаев.
