9-ншы Май – ол тек байрам тувыл, ол – сыйлы эм оьрметли уллы куьнлердинъ бириси. Енъуьв куьни элимиздеги аьр бир аьел эм аьр бир аьдем уьшин маьнели байрам. Бизим элимизде согыс йылларда ювыгын йоймаган яде аьзизин фронтка йолга салмаган аьдем йок болар.
Уллы Енъуьв… Ога йол бек авыр эм узак болган. Коьзяска, юрек сызлавларга, йойымларга, бузылувларга толы 1418 куьн эм кеше. Биз, оьзлерининъ канын эм янын аямай, енъуьвди ювыклаткан атайларымыздынъ эткен йигитликлерин бир де мутпаякпыз.
Уллы Енъуьв куьниннен алдын Ногай район еринде орынласкан аьскершилик боьлигине онынъ куллыкшыларын эм аьскершилерди кутламага Ногай район эм Терекли-Мектеб авыл администрациялар ваькиллери бардылар. Олар – «Ногайский район» МР администрациясынынъ аькимбасынынъ орынбасары Баймагомед Ярлыкапов, Профсоюз район комитетининъ председатели, Ногай район Хатынлар советининъ яслар палатасынынъ председатели Насипхан Джумаева, Терекли-Мектеб авыл администрациясынынъ куллыкшысы Айсылув Суюндикова.
Биринши болып аьскершилик боьлигининъ куллыкшыларын эм аьскершилерди Баймагомед Ярлыкапов кутлады. Ол бизим аьскершилер эл алдында эр борышын намыслы толтыраягына эм дайым да Элимизди коршалаягына бирев де шекленмейтаганын айтты. Оннан сонъ, Насипхан Джумаева 9-ншы Май байрамынынъ аьр бир элимиздинъ яшавшысына айлак та маьнели экенин белгиледи. Ол Уллы Аталык согысы йылларында енъуьвди эм аьлиги заман Украина ериндеги спецоперациясынынъ тамамын ювыклаткан баьрининъ алдында бас ийуьвимиз акында айтты. Аьскершилик боьлигининъ командири майор Магомед Гаджимагомедов эс эткен, колтыклав эм бу тыныш болмаган заманда керекли болган йылы соьзлер айтканлары уьшин, келген конакларга савболсынын айтты.
Солай ок бу куьн Халк яратувшылык эм маданият асабалыгынынъ орталыгы ман концерт уйгынланды. Онынъ катнасувшылары Равхан Султанова, Альфия Османова, Даяна Кокенеева, Айханум Аджиева согыс йылларынынъ йырларын коьнъиллерге етип йырладылар. Нурсултан Савкатов согыс катнасувшыларга багысланган ятлавды усташа яттан айтты. Шарады Гюльгерен Савкатова юритти.
Н.Кожаева.
Суьвретте: аьскершилик боьлигинде болган шарадан сонъ.
