Медицина – ол аьдем аьрекетининъ маьнели тармагы.
Сонынъ аркасы ман биз коьплеген маразлар ман уьстинликли куьреспеге эм яшав оьмиримизди узайтпага боламыз. Эм бу ерде, оьзек те, баьриси ягыннан да врачлар уьйкен сый-оьрметке тийислилер. Медицина тармагында куллык этуьвге яшав оьмирин багыслап, район яшавшылары арасында сыйлы аты сакланганлардынъ бириси – Асрет Сарсеевна Абдурахманова. Онынъ ызын ызлап, сол кеспи бойынша куллык этедилер элимиздинъ сырт каласы Сургутта онынъ кызы Саитова Эмина, татар миллетли келини Гульфия Абдурахманова, синълисининъ кызы Сеперхан Сариева, ердесимиз Алия Озганбаева.
Баьриси де яны ман сайлап алган кесписи бойынша уьстинликли кыйын саладылар. Янъыларда врач-кызлар Сургут каласында байыр клиника аштылар. Онынъ ашылувына багысланган шатлыклы шарага олардынъ ювыклары келдилер. Официаллык кепте мени де шакырганларга бек разыман. Шатлыклы оьзгерис йогары коьнъилликте озгарылды. Шара юритуьвши кыскаяклы баьрисин де кызыксындырды: баслап клиника бойынша экскурсия юритти, сонъ йыйылганларга йоравларын айтувга соьз берди, медицина ман байланыста кызыклы конкурслар озгарды. Мага да оьз йоравымды айтпага эп берилди. Янъы ашылган клиника – аьлиги заманга келисли коьп профильлик медициналык орталык. Мунда яшавшылар сапатлы эмлев-диагностикалык буйымлар ман пайдаланмага боладылар. Йогары технологиялык алатлар ман яракланган клиникада авырувлыдынъ аян диагнозын билмеге эм армаганда пайдалы кепте эмленмеге баьри аьллер де бар. Мунда йогары квалификациясы болган сулыплы врачлар куллык этедилер. Медицина тармагында куллык этуьвге багыслав аьдемнен айырым касиетликти талаплайды. Врач болып кыйын салув бу кызларга бек маьнели: медицина ман байланыслы олардынъ яшавы, кесписи, яшавдагы уьстинликлери эм бирерде етиспевликлери. Клиникады ашкан кызлар каладынъ ямагат яшавында да белсенлик пен катнасадылар. Айтпага, Эмина эм Сеперхан миллет оьрнекли ногай кийимлерин кийип, калада озгарылатаган халклар ара байрамларында, миллет тойлар фестивалинде, сабантойларда, халклар дослыгынынъ куьнинде ногай халкынынъ маданиятын коьрсетедилер. Алия Озганбаева болса – ыспайы сеси болган яркын йыравшы. Туьрли ямагат шараларда, концертлерде катнасып, ол ногай, орыс эм английс тиллеринде ярасыклы йырлайды. Назира Койлакаева.
Суьвретлерде: врач-кызлар (солдан онъга) – Гульфия Абдурахманова, Сеперхан Сариева, Эмина Саитова эм Алия Озганбаева.
