Быйыл март айындагы Сырт-Кавказ федераллык округы бойынша губернаторлардынъ медиарейтингининъ сырагыларына коьре, Дагестан Аькимбасы Сергей Меликов алдышылар сырасында деп белгиленген. Соны ман байланыста Ногай район Ямагат палатасынынъ председатели Эльмурза Саитов оьз ойын айтып билдирген.

– Сергей Меликов аьли де Дагестан Аькимбасынынъ куллыгын кесек заманга юритуьвши болып ислегеннен алып, республикадынъ бас маьселелерин билмеге эм соларды шешпеге шалысып ислейди.
Онынъ баславы ман былтыр РФ Федерация Советинде Дагестан куьн- лери болып оьткен. Сонда элимиздинъ федераллык власть органлары алдында коьп йыллардан бери биринши кере республикамыздынъ бас маьселелери коьтерилген. Солардынъ ишинде Дагестаннынъ Сырт зонасындагы ерлердинъ сырасында бизим Ногай районынынъ ерлерининъ кумланувы да айтылган. Бу маьселелер бойынша тийисли карарлар кабыл этилинген эм солар, аьлиги заман авырлыгына да карамастан, шешилер деп сенемиз.
Эндигиси, Дагестан Аькимбасынынъ быйылгы март айындагы рейтинги акында. Мага, айтпага, «Дагдизель» заводына карсы санкциялар киргистилуьв мен байланыста Сергей Меликовтынъ айткан явабы ярады. Сол санкцияларды ол Россиядынъ коршаланув промышленности уьшин сапатлы продукция аьзирлейтаган дагестан заводынынъ аьрекетине халклар ара берилип турган аьруьв белгиси болады, деп белгилеген. Меликов «Дагдизель» коллективине армаган да уьстинликлер йораган.
Март айда Дагестан Аькимбасы Каспийсктеги мектебтинъ курылысынынъ юрисин тергеятканда, республика етекшилери мундай уьйкен (1224 орынлы) эм керекли курылысты йылдынъ ызына дейим кутараягы акында билдирген. Солай ок Меликовтынъ соьзлери мен сонынъ янында курылып турган байыр балалар бавы да кулланувга берилеек. Бу курылыслардынъ тамамланувы «Билимлендируьв» миллет проектин яшавга шыгарув бойынша бир неше маьнели социаллык соравларды шешпеге амал береек, – деген газетамыздынъ хабаршысына Эльмурза Саитов.