Кайсы заманларда да куткарувшыдынъ иси сыйлы, соны ман бирге кавыфлы болган. Бу кеспиди сайлаганлар тек куьш-куватлы эм коркынышсыз болып калмай, конъысы уьшин яны авырып билген аьдемлер боладылар. Олар аьр дайым да тек кеспи борышын толтырып тувыл, юрек шакырувы ман ярдамга асыгадылар.
Ногай районынынъ Терекли-Мектебтеги «Центр ГО и ЧС» ДР-нынъ ГКУ 49-ншы номерли туьскен от пан куьресуьв боьлигинде татым ис коллектив аьрекетлейди. Ясуьйкенлер янъы келген куллыкшыларды бу тыныш болмаган иске, кайдай аьллерде кайтип оьзин юритуьв керегине уьйретедилер. Соьйтип, коьп йыллардан бери боьлик куллыкшылары куллыкта да, яшавдагы аьллерде де бир-бирине тирев болып келедилер.
Сонынъ акында боьликтинъ пожарныйы Ильяс Оразакаевич Бийболатов хабарлайды.
Ильяс Бийболатов Ногай районынынъ Батыр-Мурза авылында тувган. Оьсип, шагы еткенде, ол Эл алдында эр борышын толтырмага кетеди. Службасын Алыс Куьнтуварда бардырады. Оьзек те, патшалык япсарын коршалав бек маьнели эм яваплы ис. Аьр доьрт саьат авысып, дайым каравылда аьдемлер турадылар. Аьскерде бизим ердесимиз 2-нши эм 3-нши дережели «Отличник погранслужбы» коькирек белгиси мен савгаланган. Службасын тамамлап, эки йылдан ол тувган-оьскен ерине кайтады. Бир кесек заман Москва каласында аьрекетлейди. Оннан сонъ Ногай районындагы туьскен от пан куьресуьв боьлигинде пожарный болып куллык этеди. Мине он йылдан артык заман сол боьликте ол оьз исин яваплы толтырып келеятыр.
– Оьз исимизди, тыныш болмаса да, биз баьримиз де, боьликтеги аьр бир куллыкшы, бек суьемиз. Биревге де дежурствосында токтамага, тыншаймага заман йок. Кайсымыздынъ да оьз борышларымыз бар, соларды биз ийги этип толтырмага шалысамыз.
Оьзек те, баьле-каза аяк астында дегенлей, аьдемнинъ йорыкларды тутпаганнан яде баска себеплерден от туьсуьвлер болады. Туьскен от пан куьресуьвши адаламайтаган аьдем болмага керек, тез эм тувра карар алып билмегеде борышлы. Олардынъ сырасында тек биреви адаласа да, ис йорыгы бузылады, сырагысы ийги болмаска болады. Боьтен де от туьсуьвлер язда кырларда йыйы боладылар. Шеттен карап турмай, аьдемлер «112» номерге занъ согып, кайсы ерде от туьскенин билдиредилер. Биз, туьскен от пан куьресуьвшилер, тилсиз яв ман куьреске шыгамыз. Тек кырларда тувыл, авыллар ишинде де, уьйкен оькинишке, туьскен отка карсы шыкканымыз аз тувыл. Сонынъ уьшин, яшавшыларга дайым да тилек саламыз, маслагат этемиз саклык тутув акында, – дейди Ильяс Оразакаевич.
Ийги иси уьшин Ильяс Бийболатов Сый грамоталар ман савгаланган, ога Разылык хатлар да тапшырылган. Етекшиси Абибулла Яриков та, ис йолдаслары да оны алал эм куллыксуьер, коьримли аьел басы деп белгилейдилер.
Биз кеспи байрамы ман баьри куткарувшыларды кутлаймыз, оларга куллыгында уьстинликлер йораймыз.
Н.Кожаева.
Суьвретте: от пан куьресуьв Ногай район боьлик куллыкшылары.
