Бизде шынты йигитлер коьп, олар оьз элининъ япсарларын коршалавга аьр заманда да аьзир болып турадылар. Солардынъ ишинде бизим ердесимиз, Карагас авылда тувып-оьскен согыс аьрекетининъ ветераны Аджинияз Оьтеген увылы Акимов та бар деп биз оьктемлик пен айтамыз. Буьгуьнлерде ол Украина еринде оьтип турган специальли согыс операциясында катнасады. Оны биз шынты эр киси деп айтып, баскаларга кайдай ийги коьрим деп коьрсетпеге боламыз. Аджинияз Аталыгы уьшин, нацизмди йойытув уьшин баьри куьшин де салмага аьзир йигитлердинъ бириси болады. Биз онынъ йигерлигине сый этемиз.

Специальли согыс операциясында катнасув – бек яваплы токтас. Аджинияз Акимовка сол токтасты ал деп бирев де айтпаган, ол оьзининъ эрки мен Элимизди коршаламага кеткен. Бир неше йыллар артта Аджинияз Шешен Республикасынынъ Грозный каласында контракт бойынша куллык эткен. Сонда алган сулып йигитке буьгуьнлерде бек керекти. Ол «Барс» отрядынынъ сырасында специальли операциясында катнасып туры. Касиети бойынша Аджинияз – оьзден аьдем, оьз яшавы, аьрекети акында коьп соьйлемейди, ама айткан соьзлерининъ маьнеси бек куьшли.
– Мен оьз Аталыгыма, Элиме пайдалы болмага суьйдим, шетте калмага болмадым. Дуныяда болып турган оьзгерислер акында тынълайман. Специальли согыс операциясы басланды дегенде, бармага токтастым. Биз сонда болып турган ислерге маьне бермей болмаймыз. Аьр бир эр киси оьз сайлавын этпеге керек. Оьз куьшине, билимине сенген инсан бизим сырамызга кирмеге керекли, сол заман Россия явды енъмеге болар. Мунда келген меним йолдасларымда аьскерлик сулыбы бар, олар Афганистанда, Шешен Республикасында аьрекет эткенлер. Биз енъермиз, сол затка мен шекленмеймен, – деп айтады ердесимиз.
Тенъ-дослары Аджиниязды тек ийги яктан айтадылар. Керек заманда, ол дурыс эм йигерли токтас алып болатаган эр киси. Оьз тенълерине ол ярдам этеди, ясларды аьскерлик аьрекетине уьйретеди, кайдай аьллерге туьссе де, оьз исине, элине алал болып калады.
Янъыларда Аджинияз уьйине кыска отпускка келип кетти. Уьйдегилерине онынъ келгени – кайдай уьйкен суьйиниш. Увыллары Рашид эм Сулейман оьктемлик пен атасы акында хабарлайдылар. Аджинияз эм Альфия Акимовлар аьелинде уьш бала тербиялайдылар. Бир неше куьнлер аьели мен турып, Аджинияз аьрекет этетаган ерине кайтып кетти. Баскалай эр киси этип болмады, ол оьзин сол ерде керекли деп санайды. Онынъ айтувы ман, аьлиги заманда биз биргелесип, Аталыгымызды коршаламага керекпиз.
Россиядынъ кайбир яшавшысы буьгуьнлерде оьз борышын толтырмага керекли.
З.Аджибайрамов, «село Терекли-Мектеб» СП МО аькимбасы.