Элге кыйынлы заманлар келсе, халк аьр заман да бирлеседи, Аталыкты кара явдан саклавшыларга сенимли тирев болып, оьз коьмегин этеди. Сондай болып кыйынлы 40-ншы йылларда Элимизге фашистлер шапкынлык эткенде, баьри совет халкы согыска ярдам эткен. Хатынлар, балалар кырда, заводларда иследилер. Дагестанлылар авыр заманларда оьзлерин йигитлерше юргисткенлер. Уллы Аталык согыс йылларда енъуьвди тек колына туьбек алып тувыл, тылда да ювык эткенлер, аьскершилеримизди савыт-садак пан, кийим мен, азык-туьлик пен канагатлаганлар.
Сол йылларды эсимизге алсак, 1941-нши йылдынъ караша айынынъ ортасында Махачкалада аьрекетлейтаган предприятиелерининъ яртысы согыс заказларын толтырганлар. Согыска йибермеге керек алатларды Двигательстрой, М.Гаджиев атындагы заводлары, химзавод, ярастырув куллыклар этетаган, азык-туьлик эм енъил промышленностининъ предприятиелери эткенлер. Кыска заманнынъ ишинде республикамыздынъ еринде Запорож областиннен автокоьлик ясав заводы, Ростов-на-Дону каласыннан – «Кызыл металлист», «Кызыл байрак», «Кызыл молот» эм баска заводлары ерлестирилген.
Буьгуьнлерде, 81 йылдан сонъ, Дагестан аьли де согыс спецоперациясында катнасып турган аьскершилерге коьмек этип туры. Республикада ятар каплар, аяк кийим тигетаган предприятиелер ислеп баслаган. Сол зат бек ийги, неге десе биз кайбиримиз енъуьвди аькелуьвге оьз уьлисимизди коспага керекпиз.
Дагестан Республикасынынъ Аькимбасы Сергей Меликов сондай предприятиелер аьр заманда да патшалык коьтергишлевин алаяклар эм ол биревге де бу исти юритуьвшилерге буршав этпеге бермеегин белгиледи. Солай ок регион басшысы сондай предприятиелердинъ куллыгы таза юритилмеге керегин айтты.
Республикамыздынъ специальли согыс операциясында катнасувшыларга йиберилмеге керек затларды шыгаратаган предприятиелери дурыс эм маьнели куллыкты этедилер – олар Енъувди ювыклатадылар.
Г.Бекмуратова.