Оьткен уллы юма куьнинде Ногай районымызда ис борышларын толтырув ниет пен Дагестан Республикасынынъ Аькимбасынынъ куллыгын кесек заманга юритуьвши Сергей Алим увылы Меликов болып кетти.

Ногай районымызда ол биринши болып, Ставрополь крайы ман япсарласып турган Орта-Тоьбе авылында янъы курылган мектебте болды. Мунда Сергей Алим увылы Меликов заманга келистирилип ярастырылган спортзалды, футбол, волейбол, баскетбол, воркаут майданларын, мектебтинъ янында шашылган аьлбели, кабак бавларын коьрип кетти. Янъы кулланувга берилген бир неше йыллар узагында курылган мектебтинъ ишинде балалардынъ тигуьв оьнерлери мен танысты, савгага «Орта-Тоьбе» деген язувы ман боьрк те алды.
Ногай район орталыгы Терекли-Мектебте Дагестан Республикасынынъ кесек заманга куллыгын юритуьвши Сергей Меликов оьмир артта украин язувшысы Филипп Капельгородский мен олтыртылган паркында болды. 2018-нши йылдынъ ишинде бу айтылган паркта «Формирование комфортной среды» деген республикалык оькимет программасы ишинде ярастырылган. Сол ок парктынъ ишинде Дагестан Республикасынынъ Аькимбасынынъ куллыгын кесек заманга юритуьвши Сергей Меликов алдынгысы КПСС райкомынынъ эки шарлаклы меканын карап кетти. Бу куьнлерде мекан каравсыз аьлде туры. Субъект етекшиси мен бу меканды республикадынъ балансына алып, тергев ислерди юритип, соннан сонъ, сонынъ негизинде проект салып, капиталлы ярастырув этпеге борыш салынды.
Бу куьн йосыгында Дагестан Республикасынынъ Аькимбасынынъ куллыгын кесек заманга юритуьвши Сергей Меликов парк ортасында ерлестирилген эстеликке эм Баьтирлер аллеясында шешекей салып, аьр бир баьтирдинъ эстелигининъ алдында басын ийип кетти.
Кадрия атындагы мектебининъ меканында болып, Сергей Меликов янъы мектебтинъ курылысы ман байланыслы коьп борышлар салды.
Солай ок, ол Халк яратувшылык орталыгында ерлескен устаханада Дагестан Республикасынынъ ат казанган артисти Алибий Романовтынъ аьзирлейтаган домбыраларын да коьрип кетти. Алибий Романов болса, келген конакларга ногайдынъ байыр саз алаты, домбырады оьрлендируьвдинъ йоллары акында хабарлап кетти.
Ногай районымызда янъы ярастырылган «Шоьл тавысы» газетасынынъ, фольклор-этнографиялык «Айланай» ансамблининъ эм патшалык драмтеатрынынъ меканларында, «Ногайский район» МР администрация меканынынъ янындагы Кадрия атындагы паркында болып кетти.
Г.Сагиндикова.
Суьвретте: ДР Аькимбасы Ногай районында.