Дагестан Республикасында ана тилинде баспаланатаган сынъар «Шоьл тавысы» республикалык газетамыз дуныя ярыгын коьруьвининъ 91-нши йылына абыт алып барады. Кайсы заманларда да газетамыздынъ редакциясынынъ яваплы куллыкшылары халкымызга дуныяда болган маьнели оьзгерислер акында билдирип келгенлер.
Бу куьнлерде газета ялгыз билдируьв булагы болып калмаса да, оны юма сайын куьтип туратаганлардынъ саны аз тувыл. Газетамыздынъ бетлеринде туьрли тармакларда уьстинликлерге етискен куллыкшылары, окувда, спортта етимислерге етискен ясларымыз, солай ок район орталыгында болып кететаган етиспевликлер акында макалалар язылады. Ердеслери уьшин ногайлардынъ оьктемлигин оьстируьв эм оларды коьрим этип салув, соны ман бирге окувшылар макалаларды окып, маьселелерди эм эдаплык яктан терисликлерге эс этер деген ниетте аьрекетимиз бардырылады. Соьйтип, йылдан-йылга «Шоьл тавысы» республикалык газетасы оьз окувшылары ман бирге уьстинликли, онъайлы, соны ман бирге кыйынлы эм кайгылы йылларын оьткерип келеди. Озган йылдынъ биринши ярым йылы бизим газетамыз уьшин онъайлы эди, коьп уьстинликлерге етистик, тек сонъгы айлары бизге бек авыр эм кайгылы болды. Сол авыр куьнлердинъ кайгысы ман да биз окувшыларымыз бан газета бетлеринде де боьлистик.
Уьстимиздеги 2022-нши йылдынъ баслапкы ярым йылына газетага язылув уьстинликли оьтти. Сол исте бизге оьзининъ ярдамын эткен «Ногайский район» МР администрациясынынъ аькимбасы Мухтарбий Аджеков, баьри район учреждениелери, Ногай район ясуьйкенлери, Россия ногайларынынъ «Казыят» дин уйымы, Москва каласынынъ Ногай миллет-маданият автономиясы, Янъы Уренгой каласында яшайтаган ердеслеримиз – Альберт эм Эдуард Тамакаевлер, конъысы Кизляр, Нефтекум районларынынъ, Карашай-Шеркеш Республикасынынъ Ногай районынынъ яшавшылары. Халкымыздынъ ваькиллери ана тилимизде баспаланатаган газетамызга язылып, оьзининъ миллет борышын толтырганлар. Сол ак ниетли ислери уьшин биз оларга уьйкен, исси савболсынымызды айтамыз. Язылмага иркилгенлер болса, шынты патриотлардан коьрим алганын суьемиз.
Э.Кожаева, «Шоьл тавысы» республикалык газетасынынъ бас редакторы.
