Россияда язгы шакырув барады. Савлай элимизден, сонынъ сырасында бизим Ногай районыннан да, яслар эр борышын толтырмага кетедилер. Аьскер – ол эрклик мектеби. Ол коьпке уьйретеди: шынты дослыкты баалап, яваплылыкка эм шыдамлыкка… Энъ де маьнелиси, аьскер сыраларында куллык эткен йылларда йигитлер оьз Элин коршалап уьйренедилер.
Аьскер сыраларында бизим йигитлер оьзлерин дайым да ийги яктан коьрсетедилер. Етекшилеви берген борышларды яваплылы толтырмага шалысадылар. Солай ок оьз Элине пайдалы болмага, ортак иске оьз уьлисин коспага ымтыладылар. Оьзлерининъ билимлерин эм оьнерлерин толысынша кулланадылар.
Нариман авылында тувган яс йигит Алик Атопалиев Россия Аьскерининъ сырасында 2022-нши йылдынъ караша айыннан алып куллык этеди. Ол Хабаровск каласындагы бир аьскер боьлигине туьскен. Мунда ол коьлик айдавшы болып аьрекетлеген, оны ман бирге досы Ислам Умаров кызмет кылган. Сонъ Алик Руслан увылын Брянск областине йибергенлер.
– Аьскер сырасында аьрекет этуьв – ол аьр бир эр кисидинъ Аталыгы алдында борышы, биз оны толтырмага тийислимиз. Аьскер сыраларында мен коьп затка уьйрендим, тагы да бизди мунда атып, савытсадакларды атув уьшин йыйнап уьйреттилер. Аьскерде мен анъладым согыс спецоперациясынынъ керекли болганын. Мен, оьзек те, оны уьйде де билетаган эдим. Мунда болса шынтылайын, терен анъладым. Россия Федерациясынынъ Президенти Владимир Владимирович Путин аьр дайым да дурыс карарлар алады, – деп айтады Алик Атопалиев Эл алдындагы эр борышы акында.
Аьскер сыраларына кеткенше, бизим ердесимиз ас асувшы болып куллык эткен. Терекли-Мектеб авылындагы Кадрия атындагы мектебинде билим алган. Даьмли этип ас асып билуьви ога эр борышын толтырувда кереккен. Брянск каласында ол согыс спецоперациясынынъ катнасувшыларына ас асады. Онда ас асувшы эм азык-туьлик складынынъ начальниги болып куллык этеди.
Алик Атопалиевтинъ ата-анасы ол кайдай маьнели аьрекет бардыратаганын баслап билмейтаган эдилер, тек янъыларда ердесимиз оларга оьзин кайда экенин билдирген. Тезден бизим яска «Согыс спецоперациясынынъ катнасувшысы» деген медаль тапшырылаяк. Бизим ердесимиз яв ман дав майданда согыспайды, ама ол Россиядынъ аьскер аьрекетшилерине нацизм мен куьрести юритпеге ярдам этеди. Алик Руслан увылы бизим йигитлердинъ нацизмге карсы турмага куьшлери болсын деп ислейди. Аликтинъ анасына биз увылы уьшин кыйналмай, оны ман оьктемсисин деп тилеймиз. Ясымыздынъ усталыгы баьтирлердинъ янында болып, олар ман бирге нацизм мен куьреске, кардаш Донбасс халкынын коршалавга оьз уьлисин коспага ярдам эткен.
Коркынышсыз ердесимизге эндигиси аьскер сырасында куллык этпеге калган алты айы ийги эскеруьвлер калдырсын деп йорайман. Ол Эл алдында эр борышын тийислисинше толтырып, уьйине, кардаш-тувганларына аман-эсен кайтсын.
Н.Кожаева.
Суьвретте: Алик Атопалиев.