Кизляр районында Украинада янлары курман болган согыс спец- операция катнасувшылар эстелигине баннерлер токтастырылганлар. Сол ис Кизляр районы бойынша республика парламентининъ депутаты Вагиф Абдуллаевтинъ баславы ман уйгынланды. Ердеслеримиздинъ суьвретлери мен баннерлери Кизляр районынынъ эм Кизляр каласынынъ еринде токтастырылганлар. Белгилеп оьтейик, алдын район аькимбасы Аким Микировтынъ тапшырмасы ман авылларда да согыс спецоперациясынынъ барысында ян берген аьскершилердинъ суьвретлери салынган эди.
Элбетте, Аталык Баьтирлерининъ эстелигин оьмирлетуьв – ол кизляршыларга эм кала конакларына оьз аьскершилик борышын яшавынынъ баасы ман тийисли толтырган ердеслеримиздинъ йигитлиги акында эслерине салув болады. Баска болып, Аталыкты коршалавшысынынъ куьнине багысланган шаралар бойынша, Кизляр районыннан «Мы вместе» деген Савлайроссиялык штабынынъ волонтерлары район эм Кизляр каласынынъ ян берген аьскершилерининъ эм мобилизация бойынша кеткен яшавшыларынынъ аьр бир аьелинде болып кеттилер. Бир аьел де эс берилмей калмады.