Йыл сайын 18-нши декабрьде элимизде ЗАГС органларынынъ куллыкшылары оьзининъ кеспи байрамын белгилейдилер. Сол куьн олардынъ кеспи байрамын белгилеви 1917-нши йылда «О гражданском браке, о детях и о ведении книг актов состояния» декрети кабыл этилуьви мен байланыслы. Быйыл ведомствога 104 йыл толады.
Янъыларда Ногай районындагы Сырт территориаллык округы бойынша Дагестан Республикасынынъ Юстиция министерствосынынъ ЗАГС управлениесинде онынъ бас специалист-эксперти Тамара Суюндиковадынъ баславы ман шатлыклы шара оьтти. Мунда Ногай районынынъ туьрли авылларында элимиздинъ янъы гражданларынынъ тувувын, аьеллер курылувын эм бузылувын, солай ок аьдем яшавында баска маьнели оьзгерислерди регистрация эткен аьдемлерди кеспи байрамы ман кутламага Ногай район Хатын-кызлар советининъ председатели Асият Манкаева келди. Ол ЗАГС органларынынъ куллыкшыларынынъ иси патшалыктынъ эм аьр бир аьдемнинъ яшавында бек маьнели экенин белгиледи. Асият Бадиевнадынъ соьзлери мен, ЗАГС органларынынъ куллыкшылары аьдемлерге яшавындагы наьсипли шакларды коьп заманларга эслеринде сакламага, янъы аьел курылувы эм бала тувганы эсапка алынган заманында шатлыклы аьл туьзедилер, солай ок ювыкты йойытув ман байланыста кайгылы куьнлеринде аьдемлерди коьтергишлейдилер. Асият Манкаева Ногай районындагы ЗАГС органынынъ алдынгы куллыкшыларын да эсине алды. Олардынъ аьр бирисининъ куллыгы ман байланыслы мырады болган. Асият Бадиевнадынъ эскеруьви мен, У.Мутаирова (яткан ери еннетли болсын) Ногай районында ярасык «Дворец бракосочетания» болса экен деп мырат эткен. Ногай район Хатын-кызлар советининъ председатели оьзининъ маслагатларын да айтып озды. Ногай район яшавшылары сырасында коьп йыллар татымлыкта эм тил бирликте бирге яшаган эри мен хатынын мерекели той ман кутлавды кайтадан баслав керегин айтты.
Оьз ис йолдасларын Тамара Суюндикова да кутлады. Бас деп ол Ногай районындагы Сырт территориаллык округы бойынша ДР Юстиция министерствосынынъ ЗАГС управлениесининъ бу йылгы иси акында айтып озды:
– Озып бараяткан йыл баьримиз уьшин де тыныш тувыл эди. Бу йыл ишинде биз 542 документ бердик. Оькинишке олардынъ арасында, озган йыл ман тенълестиргенде, аьдем оьлуьвин эм аьеллер бузылувын эсапка алувынынъ саны арткан. Эгер 2020-ншы йыл 36 аьел бузылган болса, 2021-нши йыл 75 аьел бузылувы эсапка алынды. Солай ок, озган йыллар ман тенълестиргенде бала тувувынынъ эм янъы аьеллер курылувынынъ эсапка алынувы да тоьмен. Озган йыл 248 бала тувган, бу йыл болса – 218. 2021-нши йыл 81 янъы аьел курылган болса, бу йыл – 55 аьел курылганы эсапка алынды. Сога коьре, ис йолдаслар, сизге тилек, ислеген авылларда ясларга аьеллерин саклавдан тура оьз маслагатынъызды айтынъыз.
ЗАГС управлениесин аьр бир аьдем суьйинишли оьгерислер – тойлар эм бала тувувы ман байланыстырады. Сога коьре мен де, боьтен де байрам куьн, ийги затлар акында айтпага суьемен.
Бизим баьри куллыкшылар – Р.Асанова, Д.Аджибекберова, С.Абубекерова, Т.Му- талимова, З.Темирбулатова, Д.Бегалиев, А.Аджигельдиева, З.Асманбетова, С.Оз- ганбаева оьзининъ исине уьйкен яваплылык пан карайдылар. Сизинъ аьр биринъиз ортак иске оьзининъ уьлисин коспага суьеди эм бизим алдынгы етекшилер, солардынъ сырасында Фатима Межитовадынъ эм Барият Ярикбаевадынъ куьш салувы ман туьзилген ис йорыгын тутпага шалысады. Сизинъ баьринъизге де куллыкта уьстинликлер йорайман. Куьннен-куьнге аьдем яшавындагы куванышлы оьзгерислерди эсапка алувымыздынъ саны оьссин, дайым да ийги оьзгерислердинъ шайыты болайык.
Н.Кожаева.
Суьвретте: шарадан коьринис.
