СССР халк артисти, белгили дагестан композиторы Мурад Кажлаевтинъ 90 йыллык мерекеси республикамыз бойынша кенъ телевизионлык фестивали кебинде белгиленеек.

Шарады озгарув бойынша уйгынлав соравлары Дагестан Оькиметинде регион бойынша Председателининъ биринши орынбасары Анатолий Карибовтынъ етекшилиги мен оьткен йыйынында каралды. Кенъесте Дагестан Республикасынынъ маданият министри З.Бутаева, ДР Аькимбасынынъ эм Оькиметининъ уйгынлав-проектлик управлениесининъ етекшисининъ орынбасары, патшалык буйымлардынъ эм социаллык политикасы бойынша боьлигининъ етекшиси Рашия Алиева, Дагестаннынъ коьлем коммуникация эм информатизация министрининъ орынбасары Магомедбек Ахмедов, баска болып, республика бойынша аьрекет этетаган телеканаллар етекшилерининъ ваькиллери ортакшылык эттилер. Келеек йылдынъ ишинде маэстро Мурад Магомедович Кажлаев оьзининъ 90 йыллык мерекесин белгилейди. Эпидемиологиялык аьлин эсапка алып, музыкант байрам шараларын онлайн кебинде озгармага деген ойы ман боьлисти. Йыйын катнасувшылары мерекешидинъ йоравларын эсапка алув ман республика бойынша телевизионлык фестивалин озгарувы акында ойын карадылар. Республикада фестиваль бойынша композитордынъ яшав йолы эм яратувшылыгы акында документальлик фильмлери коьрсетилинееклер. Мурад Кажлаев анъ язган «Адам и Хева», «Тайна кубачинского браслета», «Тайна рукописного Корана», «Тучи покидают небо» эм баска совет фильмлери де коьрсетилинееклер. Мурад Кажлаев 42 кинофильмлерине анъ язган, олардынъ коьплери аталык киносынынъ алтын фондына киргенлер.
Кинофильмлерден баска болып, каравшылар маэстро Кажлаевтинъ анъына салынган балеттинъ сценада салынувларынынъ записьлерин де карамага амал табаяклар. Анатолий Карибовтынъ белгилеви мен, телеберуьвлердинъ, фильмлерининъ уьйкен цикли, сценага театраллык салынувы бойынша Мурат Кажлаевтинъ акында кенъ таныстырып эм, солай болып, музыкант тек элимиздинъ эм республикамыздынъ саниятына тувыл, дуныялык анъ маданиятына да кайдай уьйкен косым эткенин буьгуьнги замандасларымыздынъ савлайына да еткеруьв бек маьнели болады.