Уьстимиздеги йылдынъ курал айынынъ 20-ншы куьнинде Адиль-Халк авыл маданият уьйинде Карашай-Шеркеш Республикасынынъ Халк язувшысынынъ, ДР ат казанган маданият куллыкшысы Суюн Имамалиевич Капаевтинъ 95 йыллык мерекесине багысланган эстелик кешлиги уйгынланып оьтти.

Суюн Имамалиевич Капаев колына калем алган аьр кимге – уьлгили коьрим болып келеди. Ол оьзи буьгуьнлерде арамызда болмаса да, онынъ эткен ислери, яратувшылыгы, онынъ уллы аьдемшилиги, шынты язувшы аты дайымга бизим эсимизде яшайды. Ол аьлемет аьдем эди. Онда анъ юмартлыгы, уьйкен аьдемшилиги, табиат оьнершилиги, оьз халкына суьйими бирге оьрилген эдилер. Сол баьри зат та республикадынъ эм онда яшайтаган халкларынынъ, солай болып, коьп миллетли Россиядынъ намысы эм тавысы болмага оьз демевлигин этип келди.
Суюн Капаевтинъ яратувшылыгы оьлимсиз, неге десе онынъ геройлары бизди яшамага, тувган еримизди суьймеге, кишкей халкымыздынъ эм тувган ошагымыздынъ акында каьр шекпеге уьйретеди.
Суьвретте: С.Капаев.