«Ногай районында коронавирус маразыннан коршаланув ман байланыста вакцинация иси уьйкен оьлшемде белсенлик пен юритиледи», – деп билдиреди Ногай районынынъ бас врачы Фаризат Межитова. Онынъ айтувы ман, 8-нши август куьнине район еринде ковид авырувыннан 4050 аьдем вакцина алдылар, больницага 600 «СпутникV» вакцинасы туьскен.

Прививка эттиргенлердинъ арасында Орта-Тоьбе авыл яшавшылары да бар. Авыл басшысы Алавдин Карагуловтынъ билдируьви мен, аьлиги заманга вакцинацияды 90-нан артык аьдем оьткен. «Сельсовет Ортатюбинский» СП МО-сына киретаган Уьйсалган авылында 25 аьдем прививка эттирдилер.
– Белгилев керек, авыл яшавшылары, боьтен де ясуьйкенлер несили, вакцинацияды эш бир соьзсиз оьтедилер. Медицина куллыкшылары бизге кереклисинше вакцинады спецсумкаларда аькеледилер. Окытувшылар вакцинады алув уьшин район орталыгына кеттилер.
Бизим яшавшыларынынъ коьбиси коронавирус маразы ман авырганлар эм бу кавыфлы авырув акында коьп зат биледилер. Оькинишке, оьткен йыл кайбир ердеслеримиз коронавирус авырувыннан топырак болдылар. Бу куьнлерде 4 яшавшыларымыз коронавирус маразыннан амбулатория аьллеринде эмленедилер. Авырув авыл бойынша янъырмас уьшин баьри куьшимизди саламыз, – деди Алавдин Карагулов. Ол, солай ок вакцинацияды бириншилер сырасында оьткенин , авыл администрация куллыкшылары да прививка эттиргенин белгиледи.