Врачлардынъ эл арасында сыйы кайсы заманларда да уьйкен болган. Оларга авырыган аьдемлер уьйкен сеним мен карайдылар. Врачлар оьзлерининъ яшавын аьдемлерди эмлевге эм ярдам этуьвге багысламага аьзир инсанлар. Олар аьдемнинъ энъ де баалы – яшавы уьшин яваплылыкты оьз мойынына аладылар. Аьлиги тыныш болмаган, янъы коронавируслы юкпалы маразынынъ пандемиясы савлай дуныяды бийлеп алган заманда врачлар оьзлерининъ яшавынынъ эм ден савлыгынынъ кавыфлыгына карамастан, авырыганларды эмледилер. Олардынъ сырасында Юсуп Атурбаев айырым орынды тутады.
Юсуп Саитович Шешен Республикасынынъ Каршыга авылында тувган. Кизляр медучилищесин окып тамамлаган сонъ, ол Дагестан патшалык медицина институтында окувын бардырган. Бу окув ошагын 1999-ншы йылда окып кутарып, Ногай ЦРБ-да анестезиолог-реаниматолог исин юритип баслаган. Сол йыллар ишинде Юсуп Атурбаев ис йолдаслары эм район яшавшылары арасында сый-абырай казанган. Бу куьнлерде ол Ногай район Орталык больницасынынъ реанимация боьлигининъ заведующийининъ куллыгын юритеди. Оны баьри де оьз исининъ устасы деп биледилер. Реанимацияга бек авыр аьлдеги аьдемлер туьседилер, авыр куллыкларды толтырмага энъ де ийгилер сайланадылар. Авыр аьлдеги аьдемлерге дарманнан да бек врачтынъ йылы соьзи, йылы карасы ярдам этеди. Врачтынъ авырыганнынъ ийги болаягына сенуьвин сезуьв, маразлыга авырув ман куьреспеге куьш береди.
Юсуп Атурбаев хирургиялык операция авырыганга кавыфсыз оьтер уьшин яваплы врач. Ол, маразлыга операциядан алдын авырувды кесек заманга сездирмес уьшин, урылаяк дарманлардынъ оьлшемин тергейди. Хирургиялык операциядынъ уьстинлиги 50 процентке врач-анестезиологтынъ исине бойсынады деп айтылады. Юсуп Атурбаев хирург эм онынъ коьмекшилери мен бирге ислейди эм сав операция узагына эм оннан сонъ да авырыганнынъ аьлин тергейди.
Юсуп Саитович коронавируслы юкпалы маразынынъ пандемиясы заманында «Кызыл зонада» авыр аьлдеги авырувлыларга колыннан келген коьмегин эткен эм этеди. Мараз кутырган заман Юсуп Саитовичке юрегинде разылык саклаганлардынъ саны айлак та коьп болды. Бизим «Шоьл тавысы» республикалык газетасы аркалы коьп авырыганлар ога разылыгын билдирдилер, булай да аьдемлерден онынъ акында коьп ийги соьзлер эситтик. Сол авыр мараздынъ азабын шеккен, больницада эмленгенлер Юсуп Атурбаев акында булай айтканлар:
«Авырыганлар уьшин куьшли тынышсызланса да, коьнъилимизди коьтерер ниетте, аьр дайым да куьлемсиреп бизге киретаган эди. Арамызда куьшли авырыганга деннинъ савлыгын белгилеген, юзиндеги бир ыспайлык акында айтып кететаган эди. Йылы соьзин де аямады, эмлев исинде баьри куьшин салып бардырды».
Юсуп Атурбаевтинъ йогары кеспилик усталыгы ДР Савлык саклав министерствосынынъ, «Ногайский район» МР администрациясынынъ, «село Терекли-Мектеб» СП МО администрациясынынъ Сый грамоталары ман белгиленген.
Куллыгында уьстинликлери мен бирге Юсуп Саитович аьелинде оьз балаларын тербиялавда да уьстинликлерге етискен. Хатыны Гульзара ман бирге ол эки увыл оьстирген. Бу куьнлерде уьйкен увылы Ашим Махачкалада Правовой академияда, экинши увылы Саит-Али Санкт-Петербург каласындагы Михайловский согыс-артиллериялык академиясында окыйдылар.
Мага да Атурбаевлердинъ аьели мен, увылларымыз Эл алдына эр борышын бир аьскер боьлигинде толтырганнан себепли, коьп катнаспага туьсти. Аьел басы да, тандыр саклавшысы да касындагы аьдемге рахатлык аькеледилер, экевининъ юзинде де дайым куьлемсирев, тап нур себилгендей. Оьктемликтинъ бир тамшысы да сезилмейди. Меним ойыма коьре, аьдемлер мен ислегенлер сондай болмага керек. Гульзара коьп йыллардан бери саьбийлерге оьзининъ суьйимин аямай савкатлап, балалар бавында хыйлы заман ислейди.
Янъыларда Юсуп Атурбаев оьзининъ 50 йыллык мерекесин белгиледи. Биз ога яшавда баьри ийгиликлерди, балаларынынъ куьезине хатыны ман бирге коьп йыллар узагына суьйингенди йораймыз.
Н.Кожаева.
Суьвретте: Ю.Атурбаев.
