Тек туьнегуьнлерде мектебти тамамлаган ясларымызга Аталыкты саклавшы деген сынавын оьтпеге де заман келеди.
Аьскер сырасында ясларымыз яшавынынъ бир йылын озгарадылар. Аьскер сырасы ясларымыздынъ эрклигин беркитеди, исте яваплыкка уьйретеди, кылыктынъ кепленуьвинде себеплигин этеди. Йыл сайын районымыздан аьскер сырасына тек янъыларда мектебтинъ сыпыраларында олтырып билим алган ясларымыз йолланадылар. Буьгуьнлерде биз сол йигитликтинъ сынав мектебин оьтетаган шынты ясларымыз бан оьктемсимей болмаймыз. Сол ердеслеримиз тыныш болмаган аьскер яшавынынъ каты йорыклары эм нызамлыгы ман таныспага эм оны толтырып Эл коршалавшылары деген сыйлы атын шанъ тийдирмей оьктемли юритип келедилер.
Меним буьгуьнги хабарым ердесимиз Насрудин акында. Ол Ногай районынынъ Терекли-Мектеб авылында Алхас эм Аминат Гаджиевлердинъ аьелинде тувып – оьскен. Бала шагыннан алып спорт пан кызыксынып келеди, футбол ойыны, ястынъ суьйикли ойынларынынъ бириси эди. Яс Джанибеков атындагы орта мектебинде билим алган. Колына аттестатты алып, окувын Махачкалада бардырган. Онда ол ас асувшы курсын етимисли окып тамамлайды. Япон ашханасынынъ сыхырлыгына да уьйренип, билимин оьстирген. Окувды тамамлаган сонъ, Насрудин повар-сушист болып юреги мен сайлаган кесписи бойынша Махачкала, оннан сонъ Москва калаларында, заман оьтип, тувган Терекли- Мектеб авылында куллык эткен. Баьри тенълериндей болып, Насрудинге де аьскер сырасына йолланмага заман етти. Аьскершилик кызмети аьр кайсы эр аьдем уьшин киели борыш болатаганын ердесимиз ашык анълайды. Насрудин аьскер сырасына уьстимиздеги йылдынъ курал айында йолланды. Аьскерлик борышын ердесимиз буьгуьнлерде Смоленск областининъ Сухопутный аьскеринде етимисли оьтеди. Онынъ Аталыгы алдында алал кызмет этпеге деген антын бергенине де коьп заман болмайды. Насрудинди эм оны ман бирге аьскер сырасына йолланган йолдасларын йолга салган ата-аналары, авылдаслары, дослары, авыл яшавшылары Эл коршалавшыдынъ атын, сыйын тийисли, тат тийдирмей юритинъиз, берген антынъызга алал болып ерге туьсирменъиз деген ердеслерининъ соьзлери, йоравлары бос соьзлер болып калмаягына аьр кимимиз де сеним этемиз. Биз Аталыгы алдында борышын аьдил эм намыслы толтыраяк аьскерши ердеслеримиз акында дайым ийги соьзлер эситеегимизге ынанамыз. Бизим атайларымыз эм олардынъ ата-бабалары Элине тийисли кызмет этип келгенлей, Насрудинге онынъ ата-анасы, аьптеси Наида, иниси Абубакар, ол билим алган мектеби, авыл яшавшылары оны ман оьктемсигенин, Эли алдында борышын етимисли оьткенин, берк аьскершилик дослыгын сезгенин йораймыз.
Гульмира Нурдинова
Суьвретте: Насрудин Гаджиев.
