Украина еринде болып турган ызгы оьзгерислер эм США ман куьнбатар эллерининъ Россияга карсы экономикалык санкцияларын киргистуьвлери мен байланыста патшалыгымыздынъ азык-туьлик кавыфсызлыгын канагатлав соравы айлак та маьнели болып токтаган. Сол себептен элимиздинъ етекшилери тамак-азык эм баска туьрли энъ керекли товарлар аьзирлевшилерге айырым шакырувын эткенлер. Сонынъ акында оьз ойы ман Ногай районынынъ алдышы фермерлерининъ бириси, Куьнбатар авыл яшавшысы Мурзадин Карамурзаев боьлиседи.
– Бизим элимиздинъ тарихинде мундай аьллер биринши кере болмаган, ама сога карамастан, авыл хозяйство товарларын болдырувшылардынъ иси, каьри эм бас кайгысы – берекет оьстируьв болып калады. Биз, эгиншилер, кайсы политикалык эм табиат аьллеринде де куллык эткенмиз эм этеекпиз, неге десе бизим ис аьрекетимиз бен аьеллеримиздинъ эм патшалыгымыздынъ буьгуьнгиси эм келеектегиси байланыслы. Солай болган эм солай болаяк.
Мен былтыр оьзиме беркитилген эгин ерлеримде куьзлик бийдай шашканман. Оннан баскалай, оьз эгинши-фермер хозяйствомда мал беслев мен каьр шегемен. Йыл сайын да демеге болады, бакша культураларын да шашамыз. Сувгарылатаган ер участокларында итальян сортлы люцерна да оьстиремиз. Соьйтип, оьз кыйынымыз бан оьстирген продукциямызды оьз элимизде сатамыз.
Оьткен куьнлерде, айтпага, мага да Дагестаннынъ Сырт зонасындагы фермер хозяйстволарынынъ басшыларынынъ санында Кизляр калада болып озган кенъесте катнаспага туьсти. Сонда республикадынъ экономикасынынъ оьрленуьвининъ берклигин канагатлав эм онъайлы ямагат-политикалык эм социал-экономикалык аьллерди саклав кереги акында сорав ойласылды. Мунда бизге, авыл хозяйство товарларын болдырувшыларга, борщ аьзирлейтаган ясылшаларды оьстируьв мен де каьр шекпеге деп тилек этилинди. Сол себептен мен де быйыл оьз эгин ерлеримде ясылша оьстирип карамага суьемен.
Оннан баскалай бизге, солай ок республика еринде оьткерилеек авыл хозяйство ярмалык- ларында да ортакшылык этпеге деген маслагат берилди. Сондай ярмалыкларда яшавшылар тамак-азык товарларын рынок бааларыннан бираз тоьмен бааларга сатып алмага амал табадылар, – деди газетамыздынъ хабаршысына Мурзадин Карамурзаев.
Суьвретте: Мурзадин Карамурзаев (онъда) ДР авыл хозяйство эм тамак-азык министри Баттал Батталовты оьз хозяйствосында йолыккан аьсерде.
