Оьткен дуьйсемби куьн, 19-ншы сентябрьде, Дагестан Аькимбасы Сергей Меликов ДР экономикасынынъ берк оьрленуьвин канагатлав бойынша оперативлик штабынынъ кенъесин озгарды.

Кенъесте ортага салынып бир-неше маьнели соравлар ойласылды: электроэнергетика эм газ бан канагатлав объектлерди келеяткан кыс мезгилине аьзирлевдинъ барысы эм ЖКХ тармагына реформалар киритуьв соравы, оьксиз эм ата-ана яктан каравсыз калган балалар ман куллык юритуьв.
Регион етекшисининъ айтувы ман, кризиске карсы шаралардынъ маьнели йолы – ол инфраструктуралык тыйдажылыклардан оьтуьв.
– Бас деп, ол – энергетикалык эм коммуналлык инфраструктура тармагындагы маьселелер: онынъ етиспевликлери тек хозяйстволык яшавга буршавлыклар туьзип калмай, гражданлар яшавына да кыйынлыклар тувдырады, – деди Сергей Меликов.
Соны ман байланыста ол регион еринде ресурлар ман канагатлав организацияларга куллыгын белсенлетуьвге маьне бермеге керегин белгиледи. Солай ок регион етекшиси власть органлар эм муниципалитетлер етекшилерине оьксиз балаларды турак уьй мен канагатлав соравына эс каратпага керегин белгиледи. Бу шараларды яшавга шыгарув уьшин карыжлав артатаганга карамастан, шеретте турганлар саны оьседи.
Бу туьзилген аьлге коьре, амаллар пайдалы кулланылмайтаганы коьринеди.
Прокуратурадынъ тергевининъ сырагылары бойынша шеретке бу категорияга кирмейтаганлар салынатаганы аянланды. Сергей Меликовтынъ белгилеви мен, ондай фактлар орын таппага керек тувыл, а турак уьйге тийислилер баьри талаплавларга яваплайтаган эм яшав уьшин ийги аьллери болган квартиралар алмага тийислилер.