Аьлиги енъил болмаган заманда, он эм оннан артык йыллар узагында мектебти етекшилев тынышлардан тувылдыр. Сол тыныш болмаган ис аьрекетти бир иркуьвсиз бардыратаганлар бизим Дагестан Республикамызда, сол санда Ногай районымызда да коьп тувыл. Аьне солардынъ сырасына киреди буьгуьн биз соьз бардыраяк мектеб етекшиси Арухан Бегали кызы Байманбетова.
Ногай районынынъ уьйкен болмаган авылларынынъ бириси Карасу орта мектебин Арухан Байманбетова 10 йылдан артык заман етекшилейди. Арухан Бегали кызы 1994-нши йылдан алып педагогика тармагында куллык этип келеятыр. Оьзи Карашай-Шеркеш патшалык университетининъ тарих факультетин баьри ягыннан да уьстинликли битирген. Йогары категориялы окытувшы.
Арухан Байманбетовадынъ ис йолдаслары арасында да уьйкен сыйы бар. Сулыплы окытувшы, туврашыл эм аьдил етекши коьплеген савлайроссиялык шараларда да ортакшылык этип келеди. Айтпага, онынъ сулыбы «Йыл окытувшысы», «Билимлендируьв етекшиси», «Мектеб етекшиси» деген шараларда катнасув ман шайытланады. Арухан Бегали кызынынъ аты тек район, республика кезеклеринде оьтетаган шараларда тувыл, элимиздинъ бас каласы Москва каласында оьткен «Келеекке адым» деген шарада да оьз окувшысы ман катнаскан.
Карасу авыл орта мектебининъ сулыплы етекшиси тек оьзининъ колынынъ астында аьрекет бардырган окытувшылар, билим беретаган окувшылары араларында тувыл экеш олардынъ ата-аналары ман да йогары дережеде катнасып, исин бардырады. Ол мектеб, авыл эм районымыздынъ ямагат яшавында белсен кепте катнасады. Оьзининъ коллективи мен эм ата-аналар ман аьр заман ортак тил тавып ислейди.
Арухан Бегали кызы Байманбетова етекшилейтаган педагогикалык ис коллективте бек билимли, талаплы эм яратувшылык аьлде ислеп болатаган окытувшылар саны да аз тувыл. Олар аьр куьнлик аьрекетинде Россия эм Дагестан ерлеринде атлары ийги белгили окытувшылардынъ ис йосыгын оьз аьрекетлери бойынша кулланадылар. Эм сол мыратка етисуьв уьшин аьр йыл сайын педагогикалык алдышы сулыплары ерлестирилетаган журналларды, окытув-методикалык пособиелерди ийги кепте кулланмага шалысадылар. Оннан баскалай, Арухан Бегали кызы Россия Федерациясы эм Дагестан Республикасында оьткерилетаган конференцияларда катнасып, савгалы орынларга етисип келеди.
Сосы мектеб коллективи ана тилимизде шыгатаган журналларга, газеталарга бириншилерден болып языладылар.Оннан сонъ Дагестан халкларынынъ тиллеринде, сонынъ ишинде, ногай тилинде шыккан китаплерди аладылар эм оьз ислеринде кулланадылар.
А.КУЛТАЕВ.
Суьвретте: А.Байманбетова окувшылары ман.
