Ногай районында ана тилинде баспаланатаган сынъар «Шоьл тавысы» республикалык газетасынынъ редакциясы оьз аьрекетин 90 йылдан бери бардырады. Мунда туьрли заманларда оьз исин суьйген, куллыгын бас орынга салган куллыкшылар ислегенлер.

Токсан йыл деген аз зат тувыл, сол оьмирге ювык заман ишинде дуныяда да коьп туьрленислер болган. Олар болса, оьзек те, газетадынъ яшавына да оьз себебин этедилер. Заман ман бирге газетамыз абытлайды, ол баслап коргай иритилип, линотип машиналар кулланылувы ман шыгарылган, аьли болса компьютерлер, янъы технологиялар аркалы ис аьрекет бардырылады. Токсан йыл ишинде газетамыздынъ аты да уьш кере туьрленген. Баслап «Кызыл байрак», сонъ «Шоьллик маягы» (1991-нши йылга дейим), аьли «Шоьл тавысы» деп аталады. Солай ок район газетасыннан ол республикалык та болган.
Биз аьли коьп эситемиз редакциядынъ ясуьйкен куллыкшыларыннан алдынгы йыллардагы ислери акында, кайдай кыйын болганын олар айтадылар. Олар эслерине аладылар бирге ислеген йолдасларын. Ясуьйкен куллыкшылардан коьп заманлардан сонъ келсек те, бизге де, оькинишке, бирге ислеген, аьли арамызда йок куллыкшыларды эскермеге туьседи. Солай ок биз аьли тийисли тыншаювдагы, редакцияда алдын ислегенлерди де эсимизге аламыз. Олардынъ сырасындагы Каирбек Зулькапиевич Юмартов акында хабарымды бардырмага суьемен.
Каирбек Юмартов Кизляр педагогикалык училищесинде ногай ярыкландырувшысы Муса Курманалиевтинъ окытувшылыгы астында билим алган Ногай районынынъ айтылган окытувшылар сырасыннан. Ис аьрекетин ясуьйкенимиз Нариман авылындагы интернатта заведующий болып баслайды. Нариман авылында ол мектебте ана тилининъ окытувшысы, сонъ мектеб етекшисининъ орынбасары болып аьрекетлейди. Каирбек Зулькапиевич «ДР ярыкландырувынынъ алдышысы» деген сыйлы атка тийисли болган.
Каирбек Юмартовка «Шоьллик маягы» газетасын етекшилемеге де бактысы буйыртады. Газета бас редакторы болып ол эки йыл узагына 1987-1988-нши йылларда ислейди.
– Мен «Шоьллик маягы» газетасынынъ бас редакторы болып ислеген йылларда редакциядынъ материаллык канагатлав аьли бек осал эди. Линотип эм баспа машинкалары айлак эски болган себептен, тез-тез сынадылар. Олар эски болса да, янъылары берилмейди. Туьнге дейим редакцияда ислеп калган куьнлер коьп болатаган эди. Машинкалар сынган заманларда Бабаюрт, Кизляр, Махачкала калаларына барып, газетамызды баспалап шыгарып, алып келетаган эдик. Сол заманларда редакцияда Алев Алимов, Мурат Авезов, Магомет Кожаев, Климбек Савкатов, Адильгерей Аджиев, Любовь Уразаева, Азинет Башиева эм баскалар ислейтаган эдилер. Олардынъ сырасында аьлиге дейим ислегенлерден Магомет Кожаев бас редактор болып коьп заман, 22 йыл узагына иследи, Любовь Уразаева коьп йыллардан бери яваплы секретарь куллыгын бардырады, олар ман бирге Азинет Башиева да корректор исин юритеди. Бек кыйын болган себептен, мен КПСС Ногай район комитетине редакциядагы исимнен босатсынлар деп аьризе яздым, оны кабыл эттилер. Соьйтип, мен оьзимнинъ алдынгы окытувшы куллыгымды юритип басладым, – деп эсине алады Каирбек Юмартов.
Ясуьйкен йырма йылдан бери тийисли тыншаювда. Ол аьлиге дейим «Шоьл тавысы» газетасын окыйтаганын билдиреди. Мунда аьли ислеген куллыкшылардынъ ис сулыбын, шалысувын белгилейди. Газетамыздынъ кепленуьви де, иштелиги де ийги экенин айтады.
– «Шоьл тавысы» газетасын окып, биз, ясуьйкенлер, районымызда болган хабарларды билемиз. Сога коьре мен район яшавшыларына, боьтен де ясуьйкенлерге, «Шоьл тавысы» газетасына язылсынлар деп маслагат этемен. Газета бизим баьримизге де керек, ол кайзаманда да керек болган эм болаяк. «Шоьл тавысы» газетасынынъ редакциясынынъ куллыкшыларына, боьтен де журналистлерге, оьткир калемлери астында кызыклы, акыллы макалалар тувганын йорайман. Оларга берк ден савлык, куьннен-куьнге куллыгынынъ ийгилигин арттырып барсынлар, – деген йылы йоравларын айтады Каирбек Юмартов газета куллыкшыларына.
Н.Кожаева.
Суьвретте: К.Юмартов эм А.Эсиргепова.