Аьскер сырасында куллык этуьв эр кисиге сыйлы парыз болады. Мен аьскер сырасына 1987-нши йылда шакыртылганман. Афганистан еринде оьз борышымды толтырдым. Сол заман биз, 18 ясындагы кеделер, кайдан билейик тынышлы куьнлерде колымызга савыт-садак алып, уллы элимиздинъ япсарларын коршаламага туьсеегин. Болса да, Аталык шакырганда, бирев де ойланмады, баьриси де оьз аьзирлигин коьрсеттилер.
Мен увылларымды дослык, намыслык, Аталыкка суьйим сезимлерининъ негизинде тербияламага шалыстым. Ойлап карасак, бу соьзлерди баьриси де айтадылар, коьп кере эситемиз. Тек айтув баска, кыйынлы заманда йолдастынъ сенимли ийинине таянув, коьзинъ мен аьскершилер суьйикли Эли уьшин янларын бергенин коьрген – баска. Уьйкен увылым Джавад согыс кесписин сайлады, кишкейимиз Нурлан Ленинград областинде эр борышын толтырады. Мен ойлайман, кеделер аьскер сырасын оьтуьв керек, неге десе ол яшавда оьз ерин тавып, аьдил болмага уьйретеди.
Мен ясларга оьз соьзимди каратаман. Кыйынлыклардан коркпанъыз, оларды оьтпеге тыныш, эгер сиз аьскер сырасына барсанъыз. Энъ де кыйынлы заманларда мен армияда болган заманымды эсиме аламан. Мен оьзим афган согысын оьттим, увылым Джавад куллыгына коьре, коьплеген «ялынлы» ерлерде болады. Нурланга да аьскер сырасы пайдалы, тек ога тувыл, баьрисине де эр борышын толтырмага тийисли, неге десе бизге, элдинъ увылларына, Аталыкты коршалав керек.
М.Мамутов, афган согысынынъ катнасувшысы.
Суьвретте: Н.Мамутов.