Мен неше йыллардан бери бизим ногайлар арасында хатын-кызлардан болып, шаирлеримиз, язувшыларымыз, журналистлеримиз язатаган, баспалайтаган затларын окып, кайдайды ды уьйкен разылык алып келемен. Олардынъ язганларынынъ темасы да, ашылув йосыгы да разылык бередилер. Ол бек яхшы. Олардынъ асарлары бизим ана топырагымыз – Ногай шоьли, онынъ аьдемлери, табиаты эм куьндегилик яшавы акында дер эдим. Арада бир заманда шаирдинъ бир ятлавын окысанъ да, уьйкен разылык тувады. Калай аьруьв язганы, кайдай бир тенълестируьвлер, кайдай бир эпитетлер тапканлары коьнъилди коьтереди. Ойлайсынъ: сондай кызларымыз коьп болса экен деп…
Мен сонъгы заманда шаирлер Гульфира Бекмуратова, Тагира Джальмуханбетова, Джамиля Аманбаева язганлары ман бек кызыксынаман эм олар асардан-асарга оьрленип барувына юрек туьбиннен суьйинемен эм оьктемсиймен. Олар язганларында кайтип бир аьруьв ногай соьзлерин ерли-ерине салганларын сезбей болмайсынъ.
Мен буьгуьн йылы соьзлеримди айтаяк шаиримиз шаир-кыскаяклылар санына киреди. Ол да ким десенъиз, Россия Язувшылар союзынынъ агзасы, аьлиги заманда «Шоьл тавысы» республикалык газетамыздынъ куллыкшысы Гульфира Бекмуратова. Онынъ кол астыннан шыккан асарлары юрегимизде орын табадылар, басымызды йогарыга коьтермеге тийисли себебин бередилер: калай тема якларыннан, солай ок маьнеси якларыннан да. Мен шаир кызымыздынъ язганларын «Ногай давысы», «Шоьл тавысы» газеталар, «Байтерек» эм «Лашын» журналлары бетлериннен эш бир йибермей окып, аьруьв йосыкта танысып, аьруьв коьнъил табатаган аьдеммен. Ол зат ана адабиатымызда хатын-кызлардан болып, аякларын берк басканлар барлыгын коьрсетеди, ашыкландырады. Ойлайман, олардынъ язганлары ман келеекте де бизге суьйинмеге амаллар боларлар! Язынъыз, язынъыз! – деп оларга айтпага суьемен!
Мине Гульфира Бекмуратова шаирдинъ «Алгасама, юрегим» деген ятлавыннан бир уьзик:
Мен айтаман:
«Алгасама, кызыл гуьл,
Кенъ тогайда
ярасык пан атпага!».
Мен айтаман:
«Алгасама,юрегим,
Суьймегенге
суьйиминъди ашпага!».
Аьр бир сырада, аьр бир соьзи оьзининъ еринде, эм окыган сайын тагы да окымага суьесинъ. Аьне ол шынты поэзия тувылма?!
Шаир кызымыздынъ лирикалык ятлавлары да аз тувыл. Аьли мен «Кешир мени» ятлавыннан бир куьплетин келтирип кояйым:
Кешир мени,
юрегинъди авыртып,
Сен куьлгенде,
сага карап куьлмесем,
Кешир мени,
сагыныштан
туншыгып,
Сени буьгуьн
баскаларга
куьнлемесем…
Аьне сондай аьлемет язылган ятлавлары шаир кызымызда аз тувыл. Ол суьйиниш эм бизди тагы да суьйиндиреегине тирев.
А.Култаев,
Дагестаннынъ халк шаири.
Суьвретте:
Г.Бекмуратова.