– Биз янъыларда Россия Федерациясына ДНР, ЛНР, Запорожье эм Херсон областьлерининъ косылувы акында уьйкен тарих оьлшемли оьзгеристинъ шайытлары болдык.
Сол шатлыклы шарада Россия Президенти Владимир Путин оьзине келисли кепте йигерли, сенимли эм ашык аьлде шыгып соьйледи. Ол айтты, эгер Киев оьз патшалыгын сакламага суьетаган болса, ол янъыларда оьткен референдумларында йогарыда коьрсетилген 4 регионлардынъ гражданларынынъ эркин сыйламага керек.
Владимир Путин ювыктагы йылларда бу субъектлердинъ яшавшылары ман бирге олардынъ экономикасын, заводларын, бузылган калаларын эм авылларын, социаллык тармагын эм с.б. затларды кайтадан тургызаягы акында билдиргени айлак та ярады.
Владимир Путиннинъ соьзи мен Куьнбатар эллери Россияды бузув акында планды аьли де оьткен оьмирдинъ 90-ншы йылларында туьзгенлер. Болса да, Россия сога карамастан бузылмады, аман калды эм оьзининъ суверенитетин беркитти. Тек Куьнбатар буьгуьн де бизим элимизди кесеклерге боьлмеге ниет этеди. Олар соны ман бирге бизге карсы баьри илледи де: коркыстувды, сатып алувды, ялганлыкты кенъ кулланадылар. Болса да, Россия, Владимир Путин айтканлай, олардынъ йорыклары ман бир де яшамаяк. Россия 4 бас негизлерге таянады: православиеге, исламга, иудаизмге эм буддизмге. Россиядынъ халкы аьр заман да ямагатта эм аьелде аьдетли байлыклар болганын суьеди эм оьз алдына оьрленуьвге ыхтыяры барлыгын яклайды. Путиннинъ айтувы ман, биз дуныяда оьз йорыкларын токтастыратаган США-га эм онынъ ягын тутканларга элимизге карсы болатаган йорыкларды салмага амал бермеекпиз.
«Бизим артымызда дурыслык, бизим артымызда Россия!» деп кутарды оьзининъ соьзин патшалыгымыздынъ етекшиси. Президенттинъ соьзлерин толы кепте коьтергишлей келип, оьз ягымнан мен де ушыны ман да бизим артымызда Россия эм бизи мен бирге Путин деп коспага суьемен. Онынъ айткан баьри затлары да яшавга шыгарылатаганын мен аьруьв билемен. Сол себептен аьр бир россиянлы оьз еринде элимиздинъ куваты эм келеектеги эмишлиги уьшин оьз косымын этпеге тийисли, – деп оьз ойын билдирди Ногай район администрациясынынъ Ямагат палатасынынъ председатели Эльмурза Саитов.
