Дагестан еринде коронавируслы инфекциясынынъ яйылувынынъ алдын шалув бойынша Оперштабынынъ оьткен кезекли кенъесинде ДР Аькимбасынынъ кесек заманга куллыгын юритуьвши Сергей Меликов ыхтыяр саклав органлар куллыкшыларына COVID-19 авырувыннан вакцинация оьткени акында сертификатлар сатылатаганга эс каратпага керегин айтты.

Ногай районында туьзилген аьл акында ДР ат казанган врачы Сакинат Казуевна Шураева оьз ойын айтты.
– Бизде прививка этилетаган пункта, эм тек онда да тувыл, баска ерлерде де видеокамералар ерлестирилген. Ондай кыянатлыкты этпеге Ногай ЦРБ-сында эп йок.
Мен оьзим, 50 йыллык врач стажым ман, Россия гражданини, кайбиревлер вакцинация акында сертификат сатып алмага эп излейтаганларды дурыс коьрмеймен. Ол сизинъ савлыгынъызга зыян келтирмеге болады. Сертификатты сиз сатып аларсыз, ама ден савлыгын сатып алып болмассыз.
Ол зат сизинъ савлыгынъыздынъ кавыфсызлыгы уьшин керек. Ногай районында ялган сертификатлар беретаган медкуллыкшылар бар деп ойламайман. Ондай затты бизим бас врач Фаризат Межитова бир де эттиртпес.
Йогарыда айтканымдай, бизде видеокамералар ерлестирилген. Вакцинация эттируьвге шерет те уьйкен, сонынъ уьшин вакцинадынъ аьр пайы эсапта турады. Куьн сайын прививка этилетаган пунктынъ касында уьйкен шерет тизиледи.
Соны ман бирге, вакцинадынъ пайдалыгына ынанмайтаган онлаган аьдемлер бар. Мен сизге кескинли кепте вакцинацияды оьтпеге маслагат беремен, неге десе инфекция дайым да яман болып туьрленеди. Буьгуьнде стационарда авыр аьллик маразлылар бар. Ызгы заман биз тагы да оьз ердеслеримизди йойыттык. Сонынъ уьшин тилеймен: меним маслагатыма кулак асынъыз эм аьли уьшин тегин этилетаган вакцинады алынъыз. Бизим россиялык вакцина – ийгилердинъ бириси эм ден савлыгы уьшин кавыфсыз», – деди «Шоьл тавысы» газетасынынъ хабаршысына уьйкен ис стажы бар врач-фтизиатр Сакинат Шураева.
Суьвретте: С.Шураева.