Янъыларда, 28-нши июльде, Дагестан Республикасынынъ Аькимбасы Сергей Меликов Украина еринде аьскерлик борышын толтырувда ян берген аьскершилердинъ ювыклары эм кардаш-тувганлары ман кезекли йолыгыс озгарды.

Сергей Меликов аьскершилер ювыкларына каты кайгырувын билдирди эм баьри оьлген яслар Россия бойсынмаслыгы уьшин яшавларын курман эткен шынты йигитлер экенин белгиледи. «Оькинишке, бу кайгылы сырага сизинъ, а эгер соьйтип айтпага ызын берсенъиз, бизим тувганларымыз туьскенлер. Бизим яслар Украина еринде айырым туьзилис туьркимлер мен тувыл, а бизим тувган еримизге коьшпеге болаяк халклар ара агрессия ман куьрес юритедилер. Олар тек бизим элимизди тувыл, савлай дуныяды нацизмнен коршалайдылар. Дагестаншылар согыс майданларда, тувган ерди коршалав – ол аьр гражданиннинъ, эр инсаннынъ, тав ерининъ ясларынынъ борышы экенин анълап, оьз акында ойламай, йигитлерше куьреседилер, – деген соьзлерин каратты Сергей Меликов оьлген аьскершилердинъ ювыкларына. Солай ок Дагестан Аькимбасы йолыгыста ортакшылаган баьрисин де ян берген бир аьскерши де тийисли эс каратылмай калмаягына сендирди. – 24-нши февральден алып сизинъ кайдай да болсын маьселелеринъиз бизим ортак маьселелер болдылар, – деп сендирди Дагестан Аькимбасы. Ян берген аьскершилердинъ бу йолыгыска шакырылган ювыклары арасында согыс урысларда Эли уьшин янын курман эткен аьскерши Арифулла Байрамовтынъ анасы Кураскан Саидовна да бар эди. Йолыгыстан сонъ ол Дагестан Аькимбасы Сергей Меликовка эм Ногай район администрациясына оьз разылыгын билдирди. – Сергей Алимовичке бизим толыстырылып болмайтаган кайгымызды бизи мен боьлискени уьшин уьйкен савбол айтаман: танъ юреклиги уьшин эм, Тувган элимиздинъ кавыфсызлыгын коршалап, яшавларын берген бизим балаларымызга уьйкен эс каратканлары уьшин. Боьтен де юрегиме тийди мени Дагестан Аькимбасы ман йолыгыска Воронеж каласыннан шакырганлары, меним уныкларыма коьмек этуьв ниетти билдирип. Бу зат республика етекшисининъ энъ терен аьдемшилик касиетлиги барын шайытлайды. Солай ок мен оьз аьелимнинъ атыннан Ногай район аькимбасы Джамалутдин Эсиргеповка эм онынъ орынбасары Хамидулла Саитовка ак юрегимнен уьйкен разылыгымды билдиремен. Баьле-каза байыр болмайды экен, оны сени мен яны авырганлар боьлиседилер, – деди Кураскан Байрамова «Шоьл тавысы» республикалык газетасынынъ хабаршысына.