Буьгуьнлерде Альберт сол савгады оьзининъ уьйкен куллыксуьерлиги, шыдамлыгы эм усталыгы ман казанды. Оьз халкынынъ тарихине Олимпиада ойынларында чемпион атын казанып кируьви мен аьр бир ногайдынъ юрегинде, оьз ногайы уьшин оьктемликти, коьзинде суьйиниш коьзясларды тувдырды.

Альберт Батыргазиев сав дуныя юзинде яшайтаган ногайларды олимпиадада енъуьвди аькелуьви мен бирлестирди. Альберт Батыргазиевке туьрли ерлеринде яшаган ногайлары оьз кутлавларын айттылар. Солардынъ сырасында Россия ногайлардынъ Федераллык миллет-культуралык автономиясынынъ председатели Валерий Казаков олимпиада ойынларынынъ бокс кеби бойынша чемпионы Альберт Батыргазиевти элининъ эм ногай халкы алдында айырым етимислери уьшин «Коьк боьри» (небесная волчица) ордени мен савгалавы акында карары шыкканын айтты.
– Альберт Ханбулаттынъ увылы савлай дуныяга бизим халкымыздынъ бар экенин, бизим халкымыздынъ яшайтаганын, йигитлигин билдирди, олимпиада чемпионы болып Токио каласында алтын медалине тийисли этилди. Аьли бизим береек савгамыз да Альбертке тийисли, – деди оьз кутлавында Россия ногайлардынъ Федераллык милет-культуралык автономиясынынъ председатели Валерий Казаков.