Оьткен каты куьнде Махачкалага Ногай районыннан муниципалитет яшавшылары ман йыйылган 10 тоннадан артык гуманитарлык коьмеги йиберилген. Онда бас керекли товарлар, туьрли азык-туьликлер эм балалар азыгы кирген. Бу ак ниетли акцияда баьри авыллар аькимбаслары эм яшавшылары, райондагы баьри организациялар, предпринимательлер, волонтерлар ортакшылык эттилер.

Ногай районынынъ аькимбасы Украина еринде авыр аьллерге туьскен яшавшыларга оьз ягыннан коьмек эткенлердинъ баьрисине де разылыгын билдирди.
– Дагестан, савлай Россиядай болып, шетте калмай, бу ызгы куьнлерде гуманитарлык ярдам этуьвге белсенлик пен катнасканын коьрип турымыз. Бизим районымызда йыйылган бу товарлар Украина кашкыншыларына пайдалыгын тийгистсин. Гуманитарлык коьмегин йыюв аьли де бардырылады. Район Хатын-кызлар совети мен Россиядынъ Савытлы куьшлерининъ аьскершилери уьшин гуманитарлык коьмеги йыйылган эм йиберилген. Биргелесте биз баьри кыйынлыкларды да басымыздан кеширермиз. Соьзимизде де, ойымызда да бирге болсак, биз енъилмеспиз! – деп белгиледи район аькимбасы Мухтарбий Аджеков. Эске салайык: гуманитарлык коьмек йыюв пункты майданда «Киргу» савда орталыгында ерлескен.
Э.Кожаева.