Янъыларда Ортакроссиялык Профсоюз билимлендируьв Ногай район организациясынынъ председатели Зарета Закарьяевна Аюповадынъ эстелигине багысланган волейбол турнири озды. Онда районымыздынъ билимлендируьв учреждениелерининъ куллыкшылары катнастылар. Шарады «Ногайский район» МР администрациясы эм РФ илми эм халк билимлендируьв куллыкшыларынынъ кеспилик союзынынъ Ногай район организациясы уйгынладылар. Базласларда 12 команда ортакшылык этти. Онынъ шатлыклы кезегин Профсоюз район комитетининъ председатели Насипхан Джумаева ашты. Оннан сонъ сыйлы конаклар билимлендируьв боьлигининъ етекшиси А.Агаспарова, «Ногайский район» МР администрациясынынъ ислери мен управляющийи З.Аджиманбетова, «Яслык» яслар орталыгынынъ етекшиси А.Шамбилов, район Хатын-кызлар советининъ председатели А.Манкаева, «Ногайский район» МР Депутатлар Йыйынынынъ председатели, Нариман авыл мектебининъ етекшиси Д.Эсиргепов кутлав соьзлерин айттылар.
«Бу турнир аьдетке кирер, ол окытувшы календаринде энъ де коьрнекли спорт оьзгерислерининъ бириси болады. Эстелик – ол дуныядан аьдем кеткеннен сонъ калатаган зат, Зарета Закарьяевна бизим эсимизде яшаяк. Ойын катнасувшыларына – уьстинликлер, бизим баьримизге де – кызыклы волейбол», – деди Алтын Даутовна.
Насипхан Джумаева Профсоюздынъ баьри агзаларын тагы да бир спорт байрамы ман кутлады, баьрине де ден савлык, куллыгында уьстинликлер, онъайлык йорады.
Ойыннынъ йорыклары ман базласлардынъ бас тоьрешиси Нариман авыл мектебининъ физкультура дерисининъ окытувшысы А.Эдильбаев таныстырды.
Ойын катнасувшыларынынъ базласларга уьйкен маьне бергени, биринши ойында коьринди. Олар баьриси де базласларга бек ийги аьзирленген эдилер.
Финал ойынларда Нариман, Орта-Тоьбе, Шумлелик эм Карагас авыл мектеблерининъ командалары базластылар.
Ойыннынъ сырагылары бойынша Нариман авыл мектеби – 1-нши, Шумлелик авыл мектеби –2-нши, Орта-Тоьбе авыл мектеби – 3-нши орынларды казандылар.
Енъуьвши командага бас савга – базласлардынъ Коьшпели кубогы тапшырылды. Енъуьвши эм савгашы командалар Аюповлардынъ аьелиннен акшалай баргы эм дипломлар ман савгаландылар.
Белгиленген спорт шарасы катнасувшылардынъ коьнъилине коьнъил косты эм туьрли суьйиниш сезимлер савкатлады.
Суьвретте: енъуьвши команда.
