Савлай элимиз эм Дагестан республикадай болып, бизим Ногай район еринде де СВО-дагы аьскершилерге эм толы болмаган мобилизация бойынша согыс спецоперацияда катнасувга шакыртылганларга коьмек этуьв ниетте «Биз бирге» деген акция озгарылады.

Аьскершилер уьшин гуманитарлык коьмек этуьвде коьплеген ис коллективлер белсенлик пен ортакшылык этедилер, – деп билдирди «Шоьл тавысы» республикалык газетасынынъ корреспондентине Ногай район Хатын-кызлар советининъ председатели Асият Манкаева.
– Бу ак ниетли исте, дайымдагыдай болып, кыскаяклылар белсенлик пен катнасадылар. Педагогикалык, мектебке дейимги коллективлер, район администрациясы, авыл поселениелер, а, энъ маьнелиси, балалар да оьз ягыннан коьмеклерин тийгистедилер. Балалар аьскершилер уьшин туьрли савкатлар, хатлар аьзирлегенлер. Бизим аьскершилердинъ янларына якын тувган ериннен тек ийгиликке ынаным, олардынъ бу каты урысларда енъип, уьйлерине тез арада кайтканына сенимлик болган хатлар алмага эм хабарлар эситпеге. Мен бизим балаларга бу акцияда белсенлик пен ортакшылык этетаганлары уьшин уьйкен савбол айтаман. – деди Асият Манкаева.
Онынъ айтувы ман, аьскершилер уьшин йылы кийимлер, байыр гигиена алатлары, дарманлар, туьрли азыклар, зияпетлер йыйылган.
Ямагат аьрекетшисининъ белгилеви мен, ондай посылкалар район еринде неше кере де йыйналган.
– 22-нши октябрьде йыйылган гуманитарлык коьмектинъ бир кесеги армаган бизим аьскершилердинъ дислокация ерине еткеруьв уьшин СВО катнасувшысы, Куьнбатар авыл яшавшысыннан йиберилген. Биз уьйкен разылыгымызды билдиремиз ата-аналарга, аьеллерге: оьз эрки мен бу урыслар болган ерлерге кеткен сондай йигит увылларды тербиялап оьстиргенлери уьшин. Эм, оьзек те, бизим районда «Биз бирге» деген акциясында ортакшылык этетаганлардынъ баьрисине де ак юректен разымыз. Буьгуьн биз баьримиз бирге болмага керекпиз. Бизим аданаслар эм увыллар Эли алдында оьз борышын толтырадылар. А бизим аьримиз СВО-дынъ кутылган куьнин ювыклатув уьшин оьз уьлисин косады. Бизим куьшимиз – бирликте! – деп белгиледи Асият Манкаева.