Дагестан Республикасынынъ Аькимбасынынъ куллыгын кесек заманга юритуьвши Сергей Меликов коронавируслы инфекциядан вакцинация бойынша республика яшавшыларга шакырув этти.
«Мен сизинъ баьринъизди де йойыткан ювыкларымыздынъ эм келеектегиде яшамага керек аьдемлеримиздинъ эси мен эртенъги куьнимиз онъайлы болсын деп колымыздан келген амалларды этпеге шакыраман. Аьлиги кыйынлы заманларда, яман инфекция яйылувына карамастан, бизде бир амал бар – вакцинация. Мен билемен, биревлер вакцинацияга карсы турадылар, биревлер шекленедилер. Сондай сенимсизлик вакцинады яман деп коьрсетеди».
Бу билдируьв бойынша «Шоьл тавысы» республикалык газетасынынъ бас редакторы Эльмира Кожаева оьз ойын айтады.
– Дагестан Республикасынынъ Аькимбасынынъ куллыгын кесек заманга юритуьвши Сергей Меликов бек ушын соьзлер айтады. Озган йыл, республика басшысы айтканлай, баьримизге де бек кыйынлы эм кайгылы йыл болды. Неше ювыкларымызды, танысларымызды йойыттык биз сол заманларда. Оькинишке, олардынъ саны уьйкен. Эгер буьгуьнлерде гражданлар яваплылык пан бу соравга карамаса, биз келеекте де ювыкларымызды йойытпага боламыз.
Мен оьзим вакцинацияды оьттим, сонъ коллективим де оьтти. Вакцинациядынъ зарарлыгы йок экенин коьрип, олардынъ кардаш-тувганлары да оьтип басладылар.
Мени буьгуьнлерде вакцинацияга карсы туратаганлар сейирсиндиредилер. Олар оьзлери вакцинация оьтпеге суьймейтаганнан баскалай, баскаларга да этпенъиз деп айтадылар. Сиз вакцинация этпенъиз деп айткан инсанлар авырып, Алла сол куьнди бермесин, дуныядан тайып кетсе ше? Сол зат уьшин ким куьнали болаяк? Ким яваплык тутаяк? Бириншилердинъ сырасында вакцинация оьткен Путин ме? Яде болса сизге ден савлыгынъызды сакланъыз деп шакырув эткен Меликов па? Россия вакцинасы дуныяда энъ де ийги деп саналады. Тыс эллер сол вакцинады алар уьшин шеретте турадылар. Индияда тек туьнегуьнлерде коронавируслы инфекциядан аьдемлер оьлетаган эди, оларды орамда якканлар, аьли болса, вакцинация этуьв уьшин шеретлер турадылар. Вакцинация оьткенлер оьзлерин мараздан коршаланган деп сезедилер. Бизде ше? Россияда вакцинация оьткенлердинъ арасында автокоьликлер, квартиралар ойнатылган. Болса да, бизим элде вакцинация оьтпеге шеретте бирев де турмайды.
Мен Сергей Меликовтынъ гражданларга этилген шакырувын коьтергишлеймен. Эгер сиз оьзинъизди, кардаш-тувганларынъызды, ис йолдасларынъызды, авылдасларынъызды яман мараздан сакламага суьйсенъиз, барынъыз эм вакцинация оьтинъиз. Биревди де тынъламанъыз, тек врачларды, власть органларын эм юрегинъизди тынъланъыз.
