Оьткен киши юма куьн Ногай район орталыгы Терекли-Мектеб авылында Россия Президенти Владимир Путинди колтыклав акциясы болып озды. Бу маьнели ямагат-политикалык шарасында районнынъ ямагат организациялары, волонтерлар, яшавшылар эм муниципалитеттинъ атлылар ямагаты катнасты.
Акциядынъ йорыгы бойынша сонынъ катнасувшылары Россия, Дагестан эм ногай халкынынъ байраклары ман алдыда «Ногай» эм «Марвари» деген ат-спорт клубларынынъ атлылары эм автомобильлер айдавы ман, район орталыгынынъ Эдиге атындагы бас орамын бийлеп, авылдынъ куьнтуварындагы «Терекли-Мектеб» деген белгиси турган япсарына дейим юрип оьттилер.
Акцияда катнаскан район Савытлы куьшлерининъ эм ыхтыяр саклавшы органларынынъ Ветеранлар советининъ председатели Акманбет Сангишиев 1941-нши йылда да бизим районнан буьгуьнги яслардынъ ата-бабалары тап мундай уьйкен атлылар куьби болып фронтка кеткенин айтып белгиледи.
– Аьлиги заманда несиллер байланысы, Россия эм Дагестан халкларынынъ бирлиги барлыгы аян коьринип туры. Бизим ра- йоннан Украина еринде юритилип турган аьскершилик аьрекетинде бес контрактник авылдасларымыз ортакшылык этедилер. Оларга, оьз аьскершилик борышын намыслы кепте толтырып, уьйлерине аман-эсен кайтканын йорайман. Буьгуьн оларга, ясларга, Аталыктынъ саклавшылары болып Украинадагы нацизмди токтатув борышы тапшырылган. Бизим россия аьскершилеримиз баьриси де сол спецоперациядан аман кайтып келсин деп Алла-Таалага тилек этемен, – деди Акманбет Сангишиев газетамыздынъ хабаршысына.
Авылдынъ куьнтувар япсарына етип, акциядынъ катнасувшылары, автойолдынъ сырт ягына шыгып, митинг озгардылар. Сонда районнынъ ямагат организацияларынынъ ваькиллери шыгып соьйледилер.
Ногай районнынъ Ямагат палатасынынъ председатели Эльмурза Саитов бу озгарылып турган яваплы шара халкымыздынъ Россия Президенти Владимир Путиннинъ карарлары ман макуллыгын шайытлап туры деп белгиледи.
– Буьгуьн биз мунда Ногай ра- йонымыздынъ яшавшылары атыннан элимиздинъ етекшилерининъ, бизим Президентимиз Владимир Путиннинъ Украинады савытсызландырув эм нацистлерден босатув бойынша оьткерип турган аьрекетин колтыклав, оны ман макуллыгымызды билдируьв уьшин йыйналганмыз. Биз Луганск эм Донецк Республикаларынынъ суверенитетлерин канагатлав бойынша патшалыгымыздынъ етекшисининъ алган карарлары ман толы кепте макулмыз. Сол себептен буьгуьн район яшавшылары Президентти колтыклав акциясына бир ниетли болып келдилер.
Соны ман биз США-га эм сонынъ политикасын колтыклайтаган эллерге Украина ериннен шыгып кетсинлер деп буйырамыз. Россиядынъ эм Украинадынъ халклары – бир-бирине кардаш халклар, бизим арамызда буьгуьнге дейим де баьри зат та ийги болган болар эди, эгер шет эллери катысып, Россияга карсы политикасын юритпеген болса. Биз элимиздинъ етекшилери, биз Путин мен эм россия аьскерлери мен бирге! – деди Эльмурза Саитов.
Митингте солай ок Россиядынъ буьгуьнги политикасын яклав кереги акында «Ногай Эл» регионаллык ногай маданият автономиясынынъ председатели Зейдулла Аджибайрамов, КПРФ Ногай РК агзасы, район ыхтыяр саклавшы органларынынъ ветераны Оразали Мемеков, Ногай район имамлар советининъ председатели Алимбек Арсланов эм баскалар айтып белгиледилер.
Акциядынъ тамамында сонынъ ортакшылары баьриси бирге косылып: «Биз Россия уьшин! Биз баьримиз бирге!» – деп бир тавыстан уьш кере айттылар.
Бизим хабаршы.
Суьвретте: акциядан коьринис.
