Уьстимиздеги йылдынъ яз-куьз куьнлеринде Сырт Кавказ уьшин согыстынъ 80 йыллыгы белгиленеди. Сол йыллардынъ кырк кийик – карагыс айларында Ногай шоьли де толысынша немец басканшыларыннан босатылган.
Сога коьре, бу йыл тарихимизде айырым орынды алатаган йыл болады. Соны ман байланыслы болып, эстеликли белгиге «Шоьл тавысы» республикалык газетамыз ятлавлар, сочинениелер конкурсын уйгынлайды.

Конкурстынъ бас шартлары: сол йылларда, Уллы Енъуьвди ювыклатувга оьз косымын эткен яде кайдай болса да бир оьзгерислерде катнаскан, коьрген аьдемлердинъ акында язбага керек боласыз. Сол авыр йылларга багысланган ятлавларынъыз бан да боьлиспеге ыхтыярынъыз бар.
Конкурстынъ тамамлары уьстимиздеги йылдынъ казан айынынъ ызында, «Ногай районы немец баскыншыларыннан босатылганлы 80 йыл толды» деген темага багысланып, «Шоьл тавысы» газетамыз озгараяк тоьгерек столда келтирилеек.
Яратувшылык иси мен каьр шегетаган йолдасларды шарада катнаспага шакырамыз. Катнасувшылардынъ яслары айырылмайды. Мектеб окувшыларыннан алып газетамыздынъ ясуьйкен окувшыларына дейим катнаспага боладылар. Газетамыздынъ почтасына туьскен аьр бир макала яде ятлав газета бетлеринде орын табаяк.
Конкурста катнасаяк аьдемлер, аьзирлеген макаланъызды эм ятлавларынъызды sholtavisi@mail.ru адреси мен почтага тасламага боласыз.