Яслык – ол яшавымыздынъ тек ярасык шагы болып калмай, яс аьдем алдына уьйкен мыратлар салып, олардынъ яшавга айланувына сенген, оьзинде яратувшылык куьшин сезген аьлемет шак болып келеди. Акыллы, тербиялы, оьнерли ясларымыз дуныядынъ янъы якларын ашпага, ярасыклыкты коьрсетпеге шалысадылар.
Ногай халкында оьзлерининъ етимиси мен халк атын айттырган яслардынъ саны аз тувыл. Олар туьрли тармаклар бойынша оьзлерининъ суьйген ислеринде, билим алувда бийик уьстинликлерге етисип, касындагы туьрли миллет ваькиллерине ногай деген миллети барын таныстырып келедилер.
Ногай кыз Карина Кильжанова Ханты-Мансийск автоном округындагы Сургут районынынъ Федоровка авылында яшайды. Ол буьгуьнлерде Федоровка авылындагы 5-нши номерли мектебининъ 11-нши классынынъ етимисли окувшыларынынъ бириси болады.
Ол, сол алыс сырт якта тувган болса да, оьзининъ тувган Терекли-Мектеб авылына аьр язгы тыншаюв заманында юреги телезип кайтады, ногай тилин мутпайды, халкынынъ тарихи, аьдетлери эм маданияты ман кызыксынып келеди.
Карина 2005-нши йылдынъ коькек айынынъ 24-нши куьнинде тувган. Кыздынъ окувга уьйкен ымтылысы бары онынъ «Березка» деген балалар бавына юрип баслаганыннан, оннан сонъ биринши кере мектебке абыт алганыннан алып белгили эди. Йигерли кыздынъ билимге ымтылыслыгы оны бийик етимислерге тийисли этти. Ол оьзи окыйтаган мектебининъ белсенли катнасувшысы болып келеди. Карина йыл сайын мектеб, кала, округ бойынша озгарылатаган туьрли ярысларда, олимпиадаларда катнасып, коьп кере енъуьвши болып шыккан. Математика дериси бойынша савлайроссиялык олимпиадасында енъуьвши болувы оны алтын медалине, Сый грамотасына тийисли этти.
Карина оьз маданияты акында – орыс тилинде, орыс маданияты акында ногай тилинде ийги суьвретлев деген савлайроссиялык сочинение язув ярысынынъ муниципаллык кезегинде 1-нши орынга тийисли этилди.
Мектебте етискен уьстинликлери, Федоровка авылынынъ ямагат яшавында белсенли катнасып келгени уьшин, ол мектеб етекшилеви атыннан бир неше Разылык хатларына да тийисли этилген. Солай болып, Каринага ийги тербия бергени уьшин, онынъ атасы Оразманбет эм анасы Айшат бир неше кере Разылык хатлары ман савгаланганлар. Шалыскыр кызга яшавда атасы ман анасы эм аьптеси Индира уьйкен коьрим болып келедилер.
Окувдагы уьстинликлери уьшин Каринадынъ суьврети сый тактасында да орын тапкан. Келеекте кыздынъ врач болмага уьйкен мырады бар.
Каринага сол ойлаган мыратлары яшавга айланганын, келеекте де бийик етимислер, алдыда ашык йолды сагынаман.
Г.Нурдинова.
Суьвретте: Карина Кильжановага Сый грамотасы тапшырылув мезгили.
