Яслык – ол аьр бир аьдемнинъ энъ ярасык шагы болады. Аьдем оьзининъ яс шагында яшав йолын, яны ман суьйген кесписин сайлайды. Яслык эм мырат бир-бириси мен байланып, аьдемнинъ алдына салган мырадын яшавга айландырып келеди. Яслар – ол бизим келеектегимиз. Ногай халкымызда етимисли, тек алдыга ымтылган, оларга келеектегимизди сенмеге болаяк ясларымыздынъ саны аз тувыл.
Сондай ясларымыздынъ бириси болады Гульжана Абдулла кызы Бекмурзаева (Капашова). Буьгуьнлерде Гульжана Сургут каласындагы патшалык медициналык университетин етимисли тамамлап, кызыл дипломына тийисли болды.
Гульжана Абдулла кызы асылы ман Ногай районынынъ Карагас авылыннан болады. Ерли мектебти йогары белгилерге тамамлап, оьзлерининъ баьри тенълериндей болып, бала шагыннан эткен мырады кызды Астрахань каласындагы медициналык колледжининъ «сестринское дело» боьлигине аькелди. Оны кызыл дипломга тамамлады.
2014-нши йыл Гульжана Ханты-Мансийск автоном округындагы Сургут каласындагы округ бойынша клиникалык больницасы́нда 2017-нши йылга дейим медсестра куллыгында ис аьрекетин бардырады. Ис аьрекетининъ басында ол алган билимин оьстируьв мырат пан, Сургут каласындагы патшалык медициналык университетине туьседи. Кайсы билим бийикликлерине де кыскаяклы оьз шалыскырлыгы, ымтылыслыгы ман етисип келеди. 2016-ншы йыл Гульжана Терекли-Мектеб авыл яшавшысы, юреги мен сайлаган ян косагы Алавдин мен яс аьел курады. Медициналык университетине билим алув яс аьелдинъ яшавына буршавлык болмады. Кене де бир медициналык тармакта эки ястынъ куллык этуьви, билимин оьстирмеге шалысувы аьелди беркитип, оьрлендирип келеди. Эри Алавдин де Астрахань каласындагы медколледжин етимисли тамамлаган, буьгуьнлерде Саратов каласындагы медициналык институтынынъ студенти болады. Сургут каласында стоматологиялык лабораториясында тис, протезлер ясав бойынша усталыгын оьстирип келеди.
Эки ястынъ аьелинде уьш ясына якынлаган Сафия кызы куьезлерин артып оьседи.
Яслардынъ аьр бир етимислери мен олардынъ тувган-кардашлары ак юректен суьйинип, куьезленип келедилер. Оларга кайсы ягыннан демевликлерин бередилер.
Шалыскыр кыскаяклыдынъ алдында аьли де салынган мыратлары, ойлары коьп, солардынъ аьр кайсысы да яшавга айланып, толып келеегин йораймыз. Яшавда билимин оьстируьвде тек алдыга ымтылган яслар Алавдин эм Гульжана ногай халкымызда атын айттырган белгили етимисли врачларынынъ бириси болаягына сенемиз.
Г.Нурдинова.
Суьвретте: Гульжана Бекмурзаева.
