Ясларымыз кенъ элимиздинъ туьрли муьйислеринде суьйген ис аьрекетлерин етимисли бардырып келедилер. Солардынъ арасында окытувшы исин сайлаганлар да аз тувыл. Айтпага, сондай етимисли окытувшылардынъ бириси болады Альфия Ахмедзановна Искакова.
Альфия Искакова асылы ман Ногай районынынъ Нариман авылыннан болады. Ол Ахмедзан Аспатович эм Назбике Джуманьязовна Искаковлардынъ аьелинде тувып-оьскен.
Кыз 7-нши класска дейим Нариман авыл орта мектебинде окыйды. Онынъ Махачкалага барып билимин теренлетуьвде, оннан сонъ окытувшы кесписин яны ман сайлавында маьнели орынды онынъ окытувшылары тутадылар. Альфия Ахмедзановнадынъ белгилеви мен, онынъ яшавында оьз иси мен биринши окытувшысы Ашувхан Айнапуевна Джамалова, математика дерисиннен эм онынъ класс етекшиси Марина Исхаковна Буланбаева, орыс тилиннен окытувшысы Фатима Абдурахмановна Ваисова коьримли уьлги болып келедилер эм буьгуьнлерде олардынъ акында кыскаяклы уьйкен сый ман эскереди. Окытувшылары да оьз окувшысынынъ яшавында, ис аьрекетинде етискен аьр бир уьстинликлери мен куьезленип келедилер.
7-нши классты тамамлап, 1997-нши йыл ол окувын Махачкаладагы республика бойынша коьп профильли лицейде бардырады. Окыйтаган шагында туьрли олимпиадаларда, химия дериси бойынша илми-практикалык конференцияларында ортакшылык эткен. Кайсы ярыслардан да ол баргылы орынларынынъ иеси болып келди. Сол коьрсетип келген етимислери уьшин кызды Дагестан патшалык университетининъ химия бойынша боьлигине сынавларсыз туьспеге шакырдылар. Альфия Ахмедзановна 2006-ншы йыл окувын уьстинликли тамамлап, йогары окув ошагында алган билимин кенъейтуьв мыратта аспирантурага туьседи.
Окувды тамамлап 2006-ншы йыл Альфия Искакова республика бойынша талаплы балалар уьшин коьп профильли лицей-интернатында ис аьрекетин баслайды. 2011-нши йыл кандидатлык диссертациясын етимисли яклайды. Буьгуьнлерде Альфия Ахмедзановна химия бойынша илмилерининъ кандидаты, йогары категориялы окытувшы болады. Йыл сайын онынъ окувшылары химия дерисиннен савлайроссиялык окувшылар уьшин олимпиадаларынынъ регионаллык кезегинде енъуьвшилер эм баргы иелери болып келедилер.
Бес йылдан артык ол окыйтаган талаплы балалар эм яслардынъ аянлавы эм оьрленуьви бойынша республика бойынша орталыгында да аьрекет этип келеди. Буьгуьнлерде ол оьзининъ ис йолдаслары ман «Сириус» билимлендируьв орталыгынынъ модели бойынша «Альтаир» деген регионаллык орталыгынынъ ашылувына аьзирлик коьредилер.
Исин яны ман суьйген кыскаяклы барганнан-барган сайын оьзининъ билимин де оьстирип, бийик етимислерине тийисли болып келеди. Онынъ иси Россия Федерациясынынъ билимлендируьв эм тербиялавынынъ сыйлы куллыкшысы деген коькирек белгиси мен эм коьплеген Сый грамоталары ман, дипломлары ман белгиленген.
Уьстимиздеги йылдынъ кырк кийик айынынъ ишинде Альфия Искакова Дагестан Республикасынынъ ат казанган окытувшысы деген сыйлы атына тийисли этилди. Сол савгады окытувшы кыскаяклыга Дагестаннынъ халкларынынъ бирлесуьв куьнин байрамшылавда Дагестан Республикасынынъ Аькимбасы Сергей Меликов тапшырды.
Биз де окытувшы Альфия Ахмедзановна Искаковады сол бийик савгасы ман эм келеятырган окытувшылар байрамы ман ак юректен кутлаймыз, ога келеекте де окытувшылык, илмилик йолында йогары уьстинликлер, коьплеген талаплы окувшыларды сагынамыз.
Г.Нурдинова.
Суьвретте: Дагестан Аькимбасы Сергей Меликов Альфия Искаковага савга тапшырув мезгили.
