17-нши февральде Дагестан Аькимбасы регионга ис визит пен келген РФ Билимлендируьв министри Сергей Кравцов пан йолыгысты.
Бас темалар ойласылган йолыгыста ДР Оькиметининъ Председатели Артем Здунов, онынъ орынбасары – ДР Билимлендируьв эм илми министри Уммупазиль Омарова эм баскалар ортакшылык эттилер.
Владимир Васильев республикага дайым эс этетаганы эм онынъ маьселелерин шешуьвде коьмек беретаганы уьшин Сергей Кравцовка разылык билдирди. Оьз ягыннан Сергей Кравцов билимлендируьв бойынша республикада этилетаган куллыкты ийги деп баалады:
«Биз коьремиз янъы мектеблер салынатаганын эм уьш кезек болып окув аста-аста таятаганын. Уьш кезек болып окыйтаган школалардынъ бирисинде болдык эм республикадынъ Оькиметининъ Председатели мен бу школага янъы меканлар косылаягы акында соьйлестик.
Баска болып, биз мектеб автобуслары акында соравды ойластык. Бу яктан да уьйкен куллык этилген эм он йылдан артык кулланылган автобуслар авыстырылганлар. Мен анълаганлай, республикада налоглар артык йыйналганга 100-ден артык автобуслар алынган».
Федеральный министерстводынъ басы айтканлай, учебниклер мен канагатлав соравлары да ойласылды. «Бу яктан маьселелер болган, ама олар да шешилген. Сонынъ уьшин де разылык билдиремен.
Солай ок Дагестанда ЕГЭ болган шаклы таза эм дурыс кепте озгарылатаганына шексинмеймиз. Эндиги кезек – арт калатаган окувшылар ман, окытувшылар ман куллык этуьв.
Сизде бек аьруьв педагоглар, бизге оларга методикалы коьмек этпеге, окытувшыдынъ кесписининъ сыйын коьтермеге керек», – деп косты Сергей Кравцов.
Оьзининъ соьзинде Владимир Васильев белгилегенлей, федеральлик эм республикалык амаллардан баска болып, финанславдынъ тагы да бир булагы болган – меценатлар ягыннан коьмек.
«Миллет тиллерде учебниклерге 50 миллион маьнет шыгарган бизнесменге уьйкен разылык. Биз дурыс абытлар эткен сайын ямагат ягыннан да коьмек келеди», – деп белгиледи Дагестаннынъ Аькимбасы.
Этилген куллык акында Дагестаннынъ премьер-министри Артем Здунов толы кепте хабарлады.
– Биз Россия Федерациясынынъ Оькиметине тилек салдык, эм бизге 608 миллион маьнет шыгардылар. Биз соларга республикалык бюджеттен 220 миллион маьнет костык эм сонынъ аркасында окувшыларды учебниклер мен 100% канагатладык. Мектеблердинъ автобуслары акында айтканда, олардынъ 228-и 10 йылдан артык кулланылган эдилер.
Соравды тез арада шешуьв керек эди, неге десе балаларды куьн сайын тасыйдылар, эм бу кавыфсызлык соравы. Сонынъ уьшин де 335 автобуслар алдык,солардынъ 95-и косымша налог келимлерине алынган.
Солай ок келеек йылдынъ планларына коьре, биз 20 мектеб кулланувга береекпиз. Баьри контрактларга да кол салынган», – деп билдирди регионаллык кабминнинъ етекшиси.
