Кадрия атындагы орта мектебинде Халклар ара ана тил куьнинде сол байрамга багысланган бек ийги шара оьтти. Мунда конакта Ногай район билимлендируьв управлениесининъ етекшисининъ орынбасары Медина Гапарова, «Шоьл тавысы» республикалык газетасынынъ бас редакторы Эльмира Кожаева болдылар. Шарада ана тилининъ окытувшылары Насипхан Хасбулатовадынъ, Нурбике Кельдасовадынъ, Альмира Баякаевадынъ, Эльмира Абубекеровадынъ окувшылары катнастылар.
Шарады окытувшылар Насипхан Хасбулатова эм Альмира Баякаева ашып юриттилер. Олар ногай тилининъ шеберлиги, байлыгы эм ярасыклыгы акында айттылар. Окытувшылардынъ соьзлери мен, ана тилин билмеген, окымаган аьдемди, толы билимли деп айтып болмаймыз. Тилимиз, аьдетлеримиз эм маданиятымыз йойылып бараяткан заманда тилди билуьв эм уьйренуьв уьйкен маьнели орынды алады. Бу маьселе тек бизим халкта тувыл, коьп халкларда оьткир турады. Балага ана тилди уьйрен деп турганнан пайда йок. Онынъ канына ана тилине суьйимди синъдирер уьшин, бас деп тувган уьйине, азбарына, ювык аьдемлерине, язлыкта ак шешекейлер аткан бавына суьйимликти тербиялав керек, – деди Насипхан Ибрагимовна.
Шара барысында ногай шаирлер Муса Курманалиевтинъ, Кадриядынъ, Солтанбек Аджиковтынъ, Мурат Авезовтынъ, Суюн Капаевтинъ ана тилине багыслап язган ятлавларын окувшылар Узаир Узаиров, Эмиль Башантавов, Абдулкерим Сариев, Динара Солтанова, Медина Аджимурзаева, Алия Сулейманова, Фариза Арунова шалысып окыдылар. Сонъ йыйылганларга 4-нши «б» классынынъ окувшылары «Карлыгаш эм Ширкей» деген эртеги бойынша сценка коьрсеттилер.
Бу шарада ногай аьдетлерине де эс этилинмей калмады. Миллет кийимлерин кийген 2-нши «б» классынынъ окувшы-кызлары балады бесикке салув аьдетин коьрсеттилер. Солай ок балалар терен маьнели ногай такпакларын айттылар. Оннан сонъ 7-нши «б» класс окувшылары «Ана тилин мутпайык» деген Салимет Майлыбаевадынъ соьзлерине язылган йырды йырладылар.
Конаклар Медина Гапарова, Эльмира Кожаева эм мектеб етекшиси Альфия Акимова балаларды ана тилин суьймеге, билмеге, бааламага, сакламага шакырдылар. Солай ок Альфия Акимова ана тилин саклавда окытувшылар этетаган уьйкен куллыкты белгиледи. Элбетте, мундай кызыклы, балалар уьшин бек пайдалы шаралар ногайлар яшаган туьрли ерлердеги аьр бир окув ошагында тез-тез уйгынланып, озгарылып турса, бизим тилимиздинъ келеектегиси ярык болаяк.
Н.Кожаева.
Суьвретте: шарадан коьринис.
