1-нши сентябрь куьнинде элимиздинъ коьплеген саьбийлери мектеблердинъ капыларын аштылар эм билим дуныясына биринши абыт эттилер. Инсаннынъ яшавында бу куьн маьнели оьзгерислердинъ бириси болады. Биринши окув куьни баьримиздинъ де эсимизде ярасык эм шатлык куьни болып калады.

Амин Даутов узактагы Сургут каласында яшайды. Сав яй айларын ол Ногай районынынъ Карасув авылында оьткерди, атасы Аскерхан эм тетеси Байбике Даутовлар «баладынъ баласы балдан таьтли» дегенлей, коьнъиллери коькке етип, уныклары ман каьр шегип турдылар.
Амин быйыл биринши класска Сургут каласынынъ Ф.К.Салманов атындагы №1 гимназиясына барды, мунда онынъ абасы Залина да окыйды. Амин окып, язып болады. Балалар бавында юретаган заманда ол туьрли кружокларга, секцияларга юретаган эди, ол уьш йыл узагында тхеквондо бойынша секцияга баратаган эди. Оьзи окыйтаган гимназияда Амин карате эм ялдав секцияларына язылган.
Амин ясамага эм колдан туьрли затлар этпеге бек суьеди, сол оьнери мен ол коьплеген конкурсларда катнасып, биринши орынларга тийисли болган. Соьйтип, 4 ясында ол декоративли-колдан ясав халклар ара конкурсында биринши орынды алды. Солай ок «Япсарсыз яратувшылык» савлайроссиялык конкурсында колдан ясалган иси мен экинши орынга тийисли болды.
Амин лего конструктордан туьрли автокоьликлер, уьйкен шарлаклы уьйлер туьзеди. Мектебтен кайтып келип ок, берилген уьй борышларын толтырып, лего ман ойнайды, тагы да ол ойыншыкларын ашып, кайтадан ясайды. Белки, сондай оьнери бар бала келеекте белгили конструктор болар.
Тахир эм Татьяна Даутовлар балаларды куллыксуьер, билимли этип тербиялайдылар. Коьп балалы аьелдинъ бийкеси (аьелде 4 бала бар) Таня бос заманын саьбийлерине багыслайды. Куллыгына коьре, Тахирге узакка кетпеге туьседи, болса да ол балалар ман кыдырмага, олар ман окув акында соьйлемеге, керек болса, мектебте, балалар бавында озатаган шараларда катнаспага заман табады.
Амин билим дуныясына биринши абытын алды. Ога мен баьри уьстинликлерди йорап, ногай халкымыздынъ данъклы увылы болсын деп айтаман.
Г.Бекова.
Суьвретте: А.Даутов.