Талаплы ясларымызды коьрсек, олардынъ оьнерлерине сукланмай, алдыда етимислерди йорамай озбаймыз. Ызгы заманларда бизди суьйинтетаган ясларымыздынъ саны коьбеймесе, аз болмайды. Ама шынтылай да оьнери болмай, заманга келисли аппаратлар аркалы «талаплы» болып юргенлерди де коьремиз эм расамыз, сондайларды экинши кере йырласа, тынълагынъ да, ушынын айтсак, келмейди.
Бар яслар эм йыравлар, заманнынъ озувына да карамастан, бездирмейтаган. Келеекте сондай йыравларымыздынъ бириси Кельдимурад Махмуд увылы Боршакаев болаягына бек сенемен.
Кельдимурад Боршакаев катнаспай, ол йырламай, бурынгы ногай сазларын домбырада ойнамай Орта-Тоьбе авыл еринде бир шара да оьтпейди десем, оьтирик тувыл. Мен оьзим де асылым ман сол авылдан болганнан сонъ, авыл еринде оьткерилетаган шараларда йыйы болмага туьседи эм аьлиги заманда, янъы технологиялар оьмиринде, кызыксынатаган болсанъ, кайда не болатаганын, кайдай шара озатаганын тез аьрекетте билмеге болады. Солай болганда, сондай аьлеметли яшавда яшаганымызга коьре, Орта-Тоьбе авыл орта мектебининъ байыр сайтында Кельдимурадтынъ ортакшылык этуьви мен озатаган коьп шараларды коьремиз.
Талаплы яс балалар бавында да оьзининъ йырлап болув оьнерин коьрсеткен. Ол айлак кишкейлей йырга аваслыгы бары белгили болды. Бу куьнлерде ол доьртинши класска шыккан окувшы. Онынъ сав яшав оьмири алдыда. Аьли уьшин ол туьрли шараларда ортакшылык эткени уьшин алган грамоталары ога алдыга бармага дем береди. Онынъ сол етимислерине атасы Махмуд пан анасы Куьмисхан бек суьйинип эм куьезленип турадылар. Анасы Куьмисхан увылынынъ акында хабарлаганда, юзине куьн ярыгы туьскендей, коьзлери йылтырап кетеди.
– Кельдимурад бизим сенимимиз эм тукымымыздынъ келеектегиси. Онынъ аьр бир енъуьви бизге уьйкен байрам болып коьринеди, биз увылымыз бан бирге баьри сезимлерди де оьз юреклеримизден оьткеремиз, – дейди ол. Орта-Тоьбе авыл орта мектебининъ етекшиси Сапиет Бекмурза кызы Межитова оьзининъ тербиялавшылары акында тек куьезленип, оьктемсип соьйлейди. Сондай балаларды ол дайым коьтергишлеп, ийги соьзин айтып, колтыклап турады.
Кельдимурад Боршакаевтинъ биринши окытувшысы Айгуль Магомед кызы Сагиндикова. Ол оьзининъ окувшысын билимлер дуныясына алып барады.
– Эгер аьдем талаплы болса, ол баьри ерде де талаплы болады деген соьз де бар. Бу соьзлер тап меним окувшым Кельдимурадка келисли. Онынъ йырлап болув оьнериннен баскалай да коьп ийги касиетлери де бар. Кельдимурад бек ярасык ясайды, тенълери мен тез тил де табады. Ол кимге ярдам керексе, сол саьатлей, коьмекке аьзир бала. Онынъ атасы ман анасы да баласына уьйкен эс берип карайдылар. Кайдай оьнери эм мырады болса да, оьрлендирмеге баьри куьшлерин де саладылар. Окув яктан да уьстинликлери бар. Ол тек «доьрт» эм «бес» белгилерге окыйды. Ызгы заманларда Кельдимурад ногайдынъ байыр саз алаты домбыра ман аьвлигип баслады. Бу ерде де, кыска болжал ишинде болса да, етимислери бар.
Аьли уьшин Кельдимурад уьйкен сахнага шыкканы йок, ама онынъ яркын келеектегиси барына бек сенемиз, – дейди Айгуль Магомед кызы Сагиндикова.
Аьр бир дуныяга келген инсаннынъ Кудайымыз бан берилген борышы болады дейдилер. Кельдимурадтынъ бу дуныяга энуьви йыр ман, маданият дуныясы ман байланыслы болаягына шекленмеймен. Онынъ бил-бил кустынъ сарнавындай давазын аьли де коьп кере эситеегиме, онынъ уьстинликлери эм енъуьвлери акында газета окувшыларына билдиреекке уьмит этемен.
Алдыда Кельдимурадка тек уьстинликлерди эм тукымынынъ айтылган йигити болганын йорайман.
Г. Курганова.
Суьвретте: К.Боршакаев.
