Сулыплы, билимли куллыкшы –кайсы ерде де сыйлы эм пайдалы. Больницага керексинип келген аьдемнинъ алдында эки специалист: биревиси янъы йогары окув ошагын окып кутарган, экиншиси коьп йыллардан бери ис аьрекетти бардыратаган болса, коьбиси экиншиге бармага суьедилер. Онда тек билим тувыл, коьпйыллык сулып та бар, а сулыбы бар аьдем, коьп янъылыса коймас…
А Ногай район орталык больницасынынъ врач-терапевти Кумисхан Бегали кызы Сабутова болса, оьз иси мен сый казанып келеди. Ол Ногай район орталык больницасында ис аьрекетин бардыратаганлы кырк йылларга ювык. Сол йыллар ишинде Кумисханга терапевт, психиатр болып та ислемеге туьскен. Кайсы ис орында да ол оьз исин яваплылык пан, аьр авырувлы аьдемге оьзининъ ян йылувы ман карап келеди.
Ногай орталык больницасынынъ етекшиси Фаризат Межитова оьзининъ ис йолдасы акында булай дейди: «Кумисхан оьзининъ исининъ маьнесин бек аьруьв анълайды эм, баьри етискен уьстинликлери мен ян рахатлыкты табады. Ол – сайлаган кесписин бек суьетаган специалист, эгер керек болса, ис аьрекет, борышлар талапласа, ол тыншаюв заманын да ис аьрекеттинъ пайдасы уьшин йибермеге болады. Куьн сайын оьзининъ кеспилик усталыгын оьстируьв уьстинде ислеп те турады. Врач аьр йыл бир шарада ортакшылык этеди, айтпага, медициналык куллыкшыларынынъ конференциясы, семинары эм сондай баскалар. Авырувлы аьдемнинъ маразын айырув, ойласув деген онынъ ис борышынынъ энъ де маьнелиси болады. Сол тувыл ма, аьши кеспилик оьсуьв деген?!».
Бу куьнлерде Кумисхан Бегали кызы Сабутова бек ийги савгага, атка тийисли болды: Кумисхан Бегали кызы Дагестан Республикасынынъ вице-премьерининъ колыннан «Дагестан Республикасынынъ ат казанган врачы» деген савгады алды. Биз ак юрегимизден сулыплы врачты алган савгасы ман кутлап, дайым ис аьрекети оьрге юргенди йораймыз.
Г.Курганова.
Суьвретте: К.Сабутова.
Бирерде байыр заманын да иске багыслайды
![](https://golosstepi.ru/wp-content/uploads/sites/7/sites/7/2023/06/Sabutova-Kumushan-1024x768.jpg)